Máskeýde halal ındýstrııasynyń mamandary men sharıǵat bilgirleriniń bıznes-forýmy ótedi

13-14 maýsym kúnderi Reseı Federatsııasynyń astanasynda ótetin bul sharaǵa sharıǵat bilgirleri, halal ındýstrııasynyń mamandary, qarjy salasynyń sarapshylary, ǵylymı orta men memlekettik qurylymdardyń ókilderi qatysady. Bul arada sóz halyqaralyq Moscow Halal Expo kórmesiniń aıasynda jyl saıyn uıymdastyrylatyn Moscow Halal Business Forum-y jaıynda bolyp otyr, dep jazady muslim.kz.

Atalmysh bıznes forýmnyń maqsaty - ekonomıkadaǵy ádep prıntsıpterin damytý, halal ónimderin ótkizetin naryqty ulǵaıtý, halal sertıfıkattaý men ıslamı qarjy salasynda sheteldermen tájirıbe almasý, sondaı-aq Reseı men ıslam elderi arasyndaǵy iskerlik qarym-qatynasty nyǵaıtý.

Máskeý Halal bıznes-forýmy eki kezeń boıynsha ótedi - Moscow Halal Congress 2013 «Halal» atty IV halyqaralyq Máskeý kongresi jáne Islamic Finance and Investment Forum ıslamı ınvestıtsııa men qarjynyń IV-shi forýmy.

«Halal» kongresinde «Halal» standartyn biregeılendirý, reseılik halal ónimderdiń ımporty men eksportyn ulǵaıtý, eýrazııalyq keńistikte halal ındýstrııasyn damytý máseleleri qozǵalady.

Al qarjy jáne ınvestıtsııa forýmy osy sharaǵa qatysqandardyń ıslamı qarjy saýatyn ashyp, bilimin jetildiredi. Sonymen qatar, sarapshylar ıslam bıznesindegi tájirıbesimen bólisedi jáne ıslam naryǵyna tán ózekti de kókeıtesti máseleler men ıslam qarjysynyń damý keleshegin talqylaıdy.

Moscow Halal Business Forum Búkilreseılik kórme ortalyǵynyń 75-shi pavılonynyń májilis zalynda ótedi.