Máskeýde Eýrazııalyq ekonomıkalyq odaqtyń tsıfrlyq kún tártibi talqylandy

ASTANA. QazAqparat - 2017 jyly 17 mamyr kúni QR Premer-Mınıstriniń birinshi orynbasary Asqar Mamın Máskeýde Eýrazııalyq ekonomıkalyq komıssııa Keńesiniń otyrysyna qatysty, dep habarlandy primeminister.kz saıtynda.

Keńes otyrysy EAEO-ǵa múshe memleketterdiń aqparat mınıstrleriniń qatysýymen ótti. Qazaqstannan Aqparat jáne kommýnıkatsııalar mınıstri Dáýren Abaev qatysty.

EEK Keńesiniń otyrysynda birqatar mańyzdy máseleler qarastyryldy. 2025 jylǵa deıingi Eýrazııalyq ekonomıkalyq odaqtyń tsıfrlyq kún tártibin júzege asyrý boıynsha bastamalarǵa basa nazar aýdaryldy.

EAEO-nyń tsıfrlyq kún tártibin qalyptastyrý múshe memleketterdiń ashyq, keń ári teń quqyly yntymaqtastyǵyna, árbir memlekettiń ekonomıka kólemi men tıimdiliginiń artýyna jol ashady. EAEO ekonomıkalyq, tehnologııalyq jáne áleýmettik damýdyń jańa deńgeıine kóteriledi.

Otyrys barysynda EýrazEQ-tiń ishki naryǵyndaǵy kedergilerdi joıý máselelerine erekshe nazar aýdaryp, Keńes músheleri EýrazEQ-tiń ishki naryǵyndaǵy kedergilerdi joıýǵa baılanysty «jol kartasyn» maquldady. Budan ózge, 2016 jyly EEK sheshimderi jobalarynyń retteýshi áserin baǵalaý nátıjeleri týraly EEK-tiń esebi tyńdaldy. 

Bul sharalar kesheni QR taýarlarynyń EýrazEQ elderi naryǵyna shyǵýyna jol ashyp, shaǵyn jáne orta bıznes úshin qolaıly jaǵdaı týǵyzady.

Tıisti máselelerdi EýrazEQ-ke múshe memleketterdiń Úkimet basshylarynyń qarastyrýy úshin aǵymdaǵy jyldyń 26 mamyrynda engizý josparlanǵan.

Taýarlardy EýrazEQ-tiń Keden kodeksinde kózdelgen EEK aktilerimen, sondaı-aq, EýrazEQ-tegi sáıkestendirý quraldarymen tańbalaý júıesin damytý máseleleri Keńes múshelerimen talqylandy.

Tańbalaý júıesin engizý bolashaqta kóleńkeli ekonomıka kólemin jáne kontrafaktilik ónimderdiń aınalymyn qysqartýǵa múmkindik beredi.

Komıssııa Keńesi EýrazEQ aıasynda balalarǵa arnalǵan oıyn alańdaryndaǵy biryńǵaı qaýipsizdik talaptaryn belgileıtin tehnıkalyq reglament qabyldady. Tehnıkalyq reglamenttiń qabyldanǵan kúnnen bastap 18 aı ótken soń kúshine enýi qarastyrylǵan.

 

Budan ózge, veterınarlyq baqylaý jáne kedendik-tarıftik retteý salasynda týyndaǵan máseleler boıynsha sheshimder qabyldandy.

EýrazEQ-ti ári qaraı damytýǵa baǵyttalǵan barlyq máseleler boıynsha ózara tıimdi sheshimderge qol jetkizildi.