Máskeýde eriktilerge koronavırýsqa qarsy vaktsına egý bastaldy
MÁSKEÝ. TASS-QazAqparat – Vaktsınany tirkeýden keıingi zertteý aıasynda Máskeýdiń alǵashqy turǵyndaryna koronavırýsqa qarsy ekpe salyndy. Bul týraly sársenbide jýrnalısterge Máskeý qalasy ákiminiń áleýmettik damý máseleleri jónindegi orynbasary Anastasııa Rakova aıtty, dep habarlaıdy QazAqparat TASS agenttigine silteme jasap.
Rakova vaktsınalaýdy bastaý búkil Reseı úshin mańyzdy ekenin aıtty.
Vaktsına eki kezeńmen júzege asyrylady: vaktsınanyń birinshi komponenti birden, ekinshisi - 21 kúnnen keıin salynady. Komponentter quramynda ımmýnıtetti kóteretin belsendi zattarynyń bolýymen erekshelenedi. Vaktsınalaý tegin júrgiziledi.
Rakova ótinim berýshilerdiń sany kún saıyn artyp kele jatqanyn atap ótti. Qazirdiń ózinde 35 myńnan astam máskeýlik vaktsına saldyrtýǵa ótinim bergen. Qazir Máskeýde koronavırýsqa qarsy vaktsınany zertteý alty medıtsınalyq mekemeniń bazasynda júrgizilýde. Aldaǵy ýaqytta olardyń sany 20 bolmaq.
Rakovanyń aıtýynsha, vaktsınany 18 jastan asqan, vaktsınalaýǵa deıin eki apta aýyrmaǵan, JRVI-men aýyrmaǵan, COVID-19 juqtyrmaǵan jáne zertteýge deıin keminde eki apta buryn koronavırýs juqtyrǵan naýqastarmen baılanysta bolmaǵan, Máskeý MMS polısi bar Reseı azamaty qatysa alady.
Dúısenbi kúni Máskeýde koronavırýsqa qarsy vaktsınany zertteýge qatysýǵa ótinish bergen alǵashqy eriktiler medıtsınalyq tekserýden óte bastady. Tekserý qorytyndylary men taldama nátıjeleri boıynsha dárigerler vaktsınalaýǵa keletin adamdardy irikteıdi. Medıtsınalyq qyzmetkerler eriktilermen telefon arqyly, arnaıy mobıldi qosymsha arqyly nemese telemedıtsınalyq tehnologııalar arqyly únemi baılanysta bolady. Ózin jaısyz sezingen jaǵdaıda, erikti bul týraly dárigerge habarlaı alady.
