Máskeýde eń sulý qazaqstandyq stýdent qyz tańdaldy
ASTANA. 19 naýryz. QazAqparat - Kóktem men sulýlyq - sınonım sózder. Muny «Máskeý kóktemi» («Moskovskaıa vesna») baıqaýynyń uıymdastyrýshylary dáleldemekke tyrysty,
dep jazady «Ekspress K» gazeti búgingi sanynda.
Ótken senbide Pervoprestolnaıada eń tartymdy qazaqstandyq stýdent qyz tańdaldy. Sulýlyq tájin Lomonosov atyndaǵy Máskeý memlekettik ýnıversıtetiniń (MMÝ) ekinshi kýrs stýdenti Álııa Muhamedjanova ıelendi.
Bastamashysy retinde qazaqstandyq stýdentterdiń «Atameken» birlestigi shyqqan «Máskeý kóktemi» atty sulýlyq baıqaýy Reseıde bilim alyp júrgen Qazaqstannyń stýdent qyzdary arasynda ótti. «Eń sulý» ataǵyn ıelenýdi kóbi armandady, biraq aqtyq saıysqa tek 15 boıjetken ótti. Olar baqtaryn synaý úshin 16 naýryz kúni Máskeýge Reseıdiń túrli aımaqtarynan jınaldy.
Qazylar alqasynyń arasynda MÝZ-TV telearnasynyń dırektory, reseılik shoý-bızneste tabysty eńbek etip júrgen qazaqstandyqtardyń biri Arman Dáýletııarov boldy. Al bizdiń otandasymyz, qazaqstandyq dızaıner Nurjamal Nurpeıisova baıqaýǵa arnap jańa toptamasyn daıyndady.
Táj úshin kúreste senimdi jeńiske Lomonosov atyndaǵy MMÝ-diń stýdent qyzy Álııa Muhamedjanova qol jetkizdi. Qaraǵandynyń týmasy bolyp tabylatyn ol Máskeýde ekolog mamandyǵyn ıgerýde. Ekinshi oryn Mendeleev atyndaǵy Reseı hımııa-tehnologııalyq ýnıversıtetiniń atynan kelgen Zere Muhamedjanovaǵa berildi. Baıqaýdyń «qolasyn» Reseı memlekettik gýmanıtarlyq ýnıversıtetiniń stýdenti Laýra Jaqaeva jeńip aldy.
