Máskeýde elıtaly túngi klýbtyń negizin qalaǵan er adam 19-qabattan qulap, kóz jumdy
ASTANA. QazAqparat - Máskeýde elıtaly túngi klýbtardyń biri Soho Rooms-tyń negizin qalaýshy Sergeı Tkachenko 19 qabatty bıiktikten qulap, mert boldy.
Qaıǵyly oqıǵa 29 qańtar kúni oryn aldy, dep jazady «Komsomolskaıa pravda» gazeti.
41 jastaǵy er adam úsh qabatty bıiktikte ornalasqan turǵyn úıdiń qosymsha qurylysyna qulaǵan. Onyń denesi krannyń kómegimen túsirildi.
Áýelde Tkachenko 16-qabattan qulaǵandyǵy habarlandy, keıin oqıǵa 19-qabattaǵy páterde bolǵany anyqtaldy.
«Qaıǵyly oqıǵanyń kýási bolǵandardyń aıtýynsha, er adam 16-qabattaǵy terezeniń aldyna shyǵyp, jaqtaýlarynan ustalyp turdy. Bul nebári birneshe mınýtqa sozylǵan. Jerde turǵan adamdar oǵan qaıta ishke kir dep aıǵaılaǵan. Kórshiler birden polıtsııaǵa habarlasty. Biraq, er adam kenetten tómen qulap ketken», - dep málim etti basylymǵa quqyq qorǵaý organyndaǵy derekkóz.
REN TV arnasynyń derekkózi bolsa, Sergeı keshqurym óziniń súıiktisi Marııamen birge klýbtaǵy oıyn-saýyq keshinde bolǵanyn aıtqan. Jup onda urysyp qalǵan. Sergeıdiń dostary olar úılengeli júrgenin málim etýde.
Telearna er adamnyń bıiktikten qulaý sáti túsirilgen vıdeony jarııalady.
