Máskeýde eki myńǵa jýyq adam zańsyz aktsııaǵa qatysty: 150-ge jýyǵy ustaldy
MÁSKEÝ. TASS-QazAqparat – 31 qańtarda Máskeý ortalyǵynda ruqsat etilmegen aktsııaǵa 2 myńǵa jýyq adam qatysty, onyń ishinde BAQ ókilderi de bar. Bul týraly jýrnalısterge Reseı ІІM baspasóz qyzmeti málim etti, dep habarlaıdy QazAqparat TASS agenttigine silteme jasap.
«Máskeý qalasynda kelisilmegen qoǵamdyq shara ótti, oǵan Máskeý ýaqytymen 14:30-da 2 myńǵa jýyq adam qatysty, arasynda BAQ ókilderi de bar», - delingen reseılik ІІM baspasóz qyzmetiniń habarlamasynda.
Vedomstvo aqparatyna sáıkes, 600-ge jýyq qatysýshy uıymdasqan túrde qalanyń birneshe kósheleriniń trotýarlarymen ótýge tyrysqan.
«Polıtsııa qyzmetkerleri ózge quqyq qorǵaý qurylymdarynyń ókilderimen birge qaladaǵy qoǵamdyq tártipti qamtamasyz etýdi jalǵastyrýda», - dep atap ótti mınıstrlik.
Buǵan deıin TASS qoǵamdyq baqylaý komıssııasynyń jaýapty hatshysy Alekseı Melnıkovqa silteme jasap, polıtsııa men Reseı gvardııasynyń Máskeýdegi ruqsat etilmegen aktsııaǵa qatysqany úshin 150-ge jýyq adamdy ustaǵanyn habarlady.
«Shamamen 150 adam ustalǵan. Qoǵamdyq baqylaý komıssııasyna quqyqbuzýshylyqqa, onyń ishinde polıtsııa bólimderine tasymaldaý kezindegi buzýshylyqtarǵa shaǵym túsken joq», - dedi A. Melnıkov.
Eske sala ketsek, ótken senbide, 23 qańtarda, 4 myńǵa jýyq adam Máskeý ortalyǵyndaǵy Pýshkın alańynda ruqsat etilmegen aktsııaǵa qatysqan edi.
