Máskeýde «Dombyra — halyqtyń uly úni» festıvali ótti
MÁSKEÝ. KAZINFORM — Máskeýdegi Búkilreseılik halyq sharýashylyǵy jetistikteri kórmesindegi (VDNH) «Qazaqstan» pavılonynda Ulttyq dombyra kúnine arnalǵan «Dombyra — halyqtyń uly úni» festıvali ótti, dep habarlaıdy Kazinform agenttiginiń menshikti tilshisi.
Іs-shara mýzykanttardy, qazaq dıasporasynyń ókilderin, mádenıet qaıratkerlerin jáne kópshilikti bir arnaǵa toǵystyryp, Reseı astanasynyń mádenı ómirindegi mańyzdy oqıǵaǵa aınaldy.
Merekelik baǵdarlama aıasynda kontserttik qoıylymdar, bı nómirleri usynylyp, qazaq halqynyń dástúrli mýzykalyq murasy keńinen tanystyryldy. Festıvaldiń basty nyshany ulttyq mádenıettiń baılyǵy men ózindik bolmysyn aıshyqtaıtyn dombyra boldy.
Festıvalge qatysqan reseılik dıplomat Dmıtrıı Sývorov dombyramen alǵash ret Qazaqstanda qyzmet etken kezinde tanysqanyn jáne sodan beri ulttyq aspapty meńgerýdi jalǵastyryp kele jatqanyn aıtty.
— Búgin biz Ulttyq dombyra kúnin atap ótip jatyrmyz. Bul — Qazaqstannyń ulttyq merekesi. Ózderińiz kórip otyrǵandaı, bul mereke Reseıde de atalyp ótýde, — dedi ol.
Dombyrany zamanaýı mýzykalyq janrlarmen úılestirý týraly suraqqa jaýap bergen dıplomat festıvalde birneshe shyǵarma oryndaǵanyn jetkizdi.
— Búgin men úsh týyndy oryndadym: biri — orys halyq áni, ekinshisi — rok-n-roll stılindegi shyǵarma, úshinshisi — «Dombyra» atty noǵaı áni, — dedi Dmıtrıı Sývorov.
Onyń aıtýynsha, dombyraǵa arnalǵan alǵashqy avtorlyq shyǵarmasy Qazaqstanda júrgen kezinde dúnıege kelgen.
— Bul «Dombra-blıýz» áni bolatyn. Ol kezde men dombyrada oınaı almaıtynmyn. Bir kúni meıramhanaǵa kirsem, dombyrashy óner kórsetip otyr eken. Sol sátte osy aspapta mindetti túrde oınaýdy úırenemin dep ózime ýáde berdim. Kúılerdi de, qazaq mýzykasyn da bilmegendikten, ózim jaqsy meńgergen rok-n-rolldy oryndadym. Keıin birtindep sózderi jazylyp, osylaısha án dúnıege keldi, — dedi ol.
Keıin kásibı ustazdan tálim alyp, qazaqtyń dástúrli kúılerin meńgergenin aıtty.
Dmıtrıı Sývorov Qazaqstandaǵy dıplomatııalyq qyzmeti aıaqtalǵannan keıin de mýzykamen aınalysýdy toqtatpaǵanyn jetkizdi.
— Men Qazaqstannan 2023 jyly oraldym, sodan beri úsh jyldan beri Máskeýde turyp jatyrmyn. Soǵan qaramastan dombyrada oınaýdy jalǵastyryp kelemin, — dedi ol.
Onyń aıtýynsha, búginde basqa mýzykalyq aspaptarǵa da kóńil bóledi. Degenmen qobyz, sazsyrnaı jáne shańqobyz sııaqty qazaqtyń ulttyq aspaptaryna qyzyǵýshylyǵy saqtalǵan.
Onyń pikirinshe, qazaq dombyrasy keń dalanyń tynysyn, erkindik rýhyn jáne tabıǵattyń únin erekshe jetkize alady.
Ulttyq dombyra kúnine arnalǵan merekelik sharalar Reseıdiń ózge qalalarynda da ótti. Qazaqstannyń Qazandaǵy Bas konsýldyǵynyń, Qazan federaldyq ýnıversıtetiniń jáne «Almet» qoǵamdyq ortalyǵynyń qoldaýymen Qazan men Álmet qalalarynda mádenı baǵdarlamalar uıymdastyryldy.
«Qazaqstan» qazaqtarynyń ulttyq-mádenı avtonomııasy janyndaǵy jastar qanatynyń oryndaýynda Qurmanǵazy Saǵyrbaıulynyń, Dına Nurpeıisovanyń, Táttimbet Qazanǵapulynyń jáne basqa da kórnekti kompozıtorlardyń shyǵarmalary oryndaldy.
Sonymen qatar túrki halyqtarynyń ulttyq mýzykalyq aspaptarynyń kórmesi uıymdastyryldy.
Uıymdastyrýshylardyń aıtýynsha, dombyra dástúr men zamanaýılyqty sabaqtastyratyn, jańa mýzykalyq baǵyttarǵa beıimdele otyryp óziniń tarıhı mánin saqtap kele jatqan mádenı muranyń jarqyn sımvoly bolyp qala beredi.
Sonymen qatar mereke qarsańynda Reseıdegi qazaq mádenı uıymdarynyń shyǵarmashylyq ujymdary Máskeýdegi Taza toǵandardaǵy Abaı eskertkishi janynda jáne Qazaqstan Respýblıkasynyń Reseı Federatsııasyndaǵy elshiliginde óner kórsetti.
Ulttyq dombyra kúni Qazaqstanda 2018 jyldan beri shilde aıynyń alǵashqy jeksenbisinde atap ótiledi. Memleket basshysy Qasym-Jomart Toqaev atap ótkendeı, bul mereke halqymyzdyń ulttyq bolmysyn aıshyqtap, ásirese óskeleń urpaqtyń rýhanı tárbıesinde mańyzdy ról atqarady.
