Máskeýde balalarǵa arnalǵan qazaq tilindegi kitap tanystyryldy
ASTANA. QazAqparat - Máskeýde ótip jatqan halyqaralyq kitap kórmesinde kópshilikke, balalarǵa arnalǵan fentezı janrynda jazylǵan qazaq tilindegi tuńǵysh kitap tanystyryldy. Bul týraly Habar 24 jazady.
Bul forým - Reseı men Shyǵys Eýropadaǵy eń aýqymdy shara. Kórme jyl saıyn qyrkúıek aıynda bastalady. Bıylǵy forým balalar ádebıetine arnalǵan. Onda 25 eldiń 100 myńnan astam týyndy kópshilik nazaryna usynyldy. Qazaqstan kitaptaryna suranys joǵary, úsh kún ishinde jartysyna jýyǵy satylyp ketken. Kórmege qatysýshylar ásirese elimizdiń tarıhy, mádenıeti jáne tabıǵaty týraly jazylǵan «Meniń Qazaqstanym» kitabyna qyzyǵýshylyq tanytqan.
Almıra Sýjıkova, «Almatykitap baspasy» bas redaktorynyń orynbasary: -
«Bizdiń basty baǵytymyz bul ólketaný. Qazir «Rýhanı jańǵyrý» Elbasymyzdyń baǵdarlamasy qabyldanyp, sonyń jobasymen oqýlyqtardy daıyndap jatyrmyz. Eltaný jóninde bes oblystyń kitabyn shyǵardyq. Qazaqtyń salt dástúrinen batap onyń turmysy, janýarlar álemi, ósimdikter álemi, darhan dastarhan degen kitaptarymyz bar. Bul jerde barlyǵy qamtylǵan. Úshinshi kún jumys istep jatyrmyz, kitabymyzdyń jartysynan kóbin satyp jiberdik», - dedi Almatykitap baspasy» bas redaktorynyń orynbasary Almıra Sýjıkova.
Al «Folıant» baspasy dırektorynyń orynbasary Jeńis Qazanǵapov Reseıde kóp oqylatyn otandyq kitaptarmen qatar jańalaryn da alyp kelgendigin jáne kitaptardyń mazmunynan bólek olardyń muqabasyna da kóńil bólingendigi týraly aıtty.
