Máskeýde Álıhan Bókeıhanov týraly kitaptyń tusaýy kesildi

ASTANA. QazAqparat - Máskeýdegi Qazaqstan Elshiliginde «Alash» partııasy kóshbasshylarynyń biri, qazaqtyń kórnekti qoǵam jáne memleket qaıratkeriniń ómiri men qyzmeti týraly «Alıhan Býkeıhanov. Chelovek-epoha» («Álıhan Bókeıhanov. Ańyz adam») kitabynyń tusaýkeseri ótti, dep habarlaıdy QR SІM baspasóz qyzmeti.

Kitap avtory — reseılik ǵalym, tarıh ǵylymdarynyń doktory, professor Vıktor Kozodoı.

Avtor óz eńbeginde derekkózderdi, materıaldar men faktilerdi, sonyń ishinde buryn ǵylymı aınalymda paıdalanylmaǵan muraǵat qujattaryn, estelikterdi, sol jyldardaǵy gazet-jýrnal betterindegi jarııalanymdardy paıdalandy.

Buǵan deıin kitaptyń tusaýkeseri Qazaqstannyń bes qalasynda (Astana, Almaty, Pavlodar, Semeı, Qaraǵandy) sátti ótken bolatyn. Endi, reseılik ǵalymdar men sarapshylardyń qatysýymen Máskeý qalasynda ótti.

Jıyndy ashqan Qazaqstannyń Reseıdegi Elshisi Ermek Kósherbaev bul kitapty Álıhan Bókeıhanov tulǵasynyń alǵashqy tereń jáne tutas ǵylymı zertteýi dep atady. Tarıhı ádilettilikti qalpyna keltirý jáne qalyń buqaraǵa aqparat berý aıasynda Alash qozǵalysy qyzmetiniń kóptegen qyrlary ashylmaǵanyn eske saldy. Osyǵan baılanysty, bul kitap Qazaqstannyń Táýelsizdigin boljaǵan tarıhı oqıǵalardy zertteýge eleýli úles qosty.

Shara barysynda Ermek Kósherbaev Vıktor Kozodoıǵa 2-dárejeli «Dostyq» ordenin jáne Qazaqstan Respýblıkasy Prezıdentiniń Alǵys hatyn tabys etti.

Óz kezeginde ǵalym Qazaqstan basshylyǵyna joǵary marapaty úshin alǵys aıtyp, kitapty eki el halyqtary arasyndaǵy dostyqty nyǵaıtýǵa qosqan qarapaıym úlesi dep atady. Onyń pikirinshe, Álıhan Bókeıhanovty Qazaqstannyń ǵana emes, Reseıdiń de tarıhı qaıratkeri dep sanaýǵa bolady, óıtkeni ol Memlekettik Dýmaǵa saılandy, Búkilreseılik uıymdardyń jumysyna jáne Búkilreseılik máselelerdi sheshýge qatysty.

Sóz sońynda Vıktor Kozodoı kitaptyń qazaq tiline aýdarylǵanyn aıtyp, jaqyn arada onyń jaryq kórýine úmit bildirdi.

Foto: kazembassy.ru