Máskeýde akter Efremovtiń isi boıynsha sot jabyq ótedi
MÁSKEÝ. QazAqparat – 29 shildede Máskeý qalasynyń Presnenskıı sotynda Reseı akteri Mıhaıl Efremovtiń isi boıynsha aldyn ala tyńdaý ótkiziledi. Belgili akter Máskeý ortalyǵynda bir adamnyń ólimine ákelgen jol-kólik oqıǵasynda aıyptalyp otyr. Bul týraly QazAqparat TASS agenttigine silteme jasap habarlaıdy.
Sottyń baspasóz hatshysy Lela Kokaıanyń aıtýynsha, otyrys jergilikti ýaqytpen saǵat 11:00-ge belgilengen. Ol jabyq rejımde ótedi.
Aldyn ala tyńdaý kezinde sot taraptar ótinishterin qarastyryp, istiń qaralatyn kúnin belgileıdi, bultartpaý sharasyn uzartady. Efremovtiń úıqamaqta otyrý merzimi 9 tamyzda aıaqtalady.
Іs boıynsha jábirlenýshiler bolyp tórt adam tanylǵan: ol jol-kólik oqıǵasynda qaıtys bolǵan Sergeı Zaharovtiń jesiri, aǵasy jáne eki uly. Olardyń barlyǵy sotta Efremovqa azamattyq talaptaryn usynýda josparlap otyr. Olardyń ókili Aleksandr Dýbrovınskıı talap aryzdardyń jalpy somasyn ataǵan joq. Biraq advokat Pashaev másele 40 mln rýbl jaıynda ekenine senimdi.
Qaıtys bolǵan Zaharovtiń otbasy akterden ótemaqy alýdan bas tartty.
Eske salsaq, mas kúıinde jol apatyna túsken reseılik akter Mıhaıl Efremov úndeý jasady.
