Máskeýde AES qurylysyna qatysty referendým qalaı ótip jatyr
ASTANA. KAZINFORM – Qazaqstanda atom elektr stansasyn salýǵa qatysty jalpyhalyqtyq referendým ótetin kúni Máskeýde Qazaqstannyń Reseıdegi Elshiliginde ornalasqan №397 saılaý ýchaskesi jergilikti ýaqyt boıynsha saǵat 07:00-de (Astan ýaqytymen saǵat 9-da) jumysyn bastady.
Saılaý ýchaskesiniń músheleri men qazaqstandyq dıplomattar saılaý ýchaskesin ashý rásimin ótkizip, Qazaqstan Respýblıkasynyń Ánuranyn oryndady. Kórshi memlekettiń astanasynda júrgen barlyq qazaqstandyq azamat elindegi AES qurylysyna qatysty óz pikirin bildire alady.
Dıplomatııalyq ókildik azamattardy aldaǵy referendým týraly aqparattandyrý jumystaryn júrgizdi. Saılaýshylardyń joǵary belsendiligi kútilýde.
Reseı aýmaǵynda Qazaqstan Respýblıkasynyń Máskeýdegi Elshiliginde, sondaı-aq Qazaqstan Respýblıkasynyń Sankt-Peterbýrg, Qazan, Omby jáne Astrahan qalalaryndaǵy Bas konsýldyqtarynda saılaý ýchaskeleri ashyldy.
Saılaý ýchaskesi saǵat 07:00-den bastap jumys isteıdi, daýys berý Máskeý ýaqytymen 20:00-de aıaqtalady. Saılaý ýchaskesine daýys berýge kelgen Qazaqstan Respýblıkasynyń árbir azamatynyń tólqujaty nemese jeke kýáligi bolýy tıis.
№397 saılaý ýchaskesinde Qazaqstan Respýblıkasynyń barlyq jastaǵy jáne kásiptegi azamattary, sonyń ishinde Reseıde ýaqytsha turatyn, memlekettik organdar men jeke kompanııalardyń qazaqstandyq ókildikteriniń qyzmetkerleri, Máskeý JOO stýdentteri men Qazaqstan Respýblıkasy Qorǵanys mınıstrliginiń kýrsanttary, sondaı-aq referendým kúni Máskeý qalasynda bolatyn basqa da sanattaǵy tulǵalar daýys bere alady.
Eske salaıyq, búgin qazaqstandyqtar atom elektr stantsııasyn salý máselesi boıynsha jalpyulttyq referendýmda daýys beredi.
Respýblıkalyq referendým bıýlleteninde bir ǵana saýal bolady: Siz Qazaqstanda atom elektr stantsııasyn salýǵa kelisesiz be? Daýys berýshi jaýaptyń eki nusqasynyń birin tańdaıdy: «Iá, kelisemin» nemese, «Joq, kelispeımin».
Memlekettik keńesshi Erlan Qarın AES salýǵa qatysy referendýmda elordadaǵy №164 daýys berý ýchaskesinde óz tańdaýyn jasady.
Premer-mınıstr Oljas Bektenov Astana qalasyndaǵy Oqýshylar saraıynda ornalasqan №61 ýchaskege kelip daýys berdi.
Osyǵan deıin Almaty ákimi Erbolat Dosaevtyń jubaıymen birge daýys berý ornyna kelgeni týraly jazǵan edik.
Ózderiniń konstıtýtsııalyq quqyǵyn Koreıa Respýblıkasyndaǵy Qazaqstan azamattary alǵashqylardyń biri bolyp júzege asyrdy.
Sondaı-aq Beıjińdegi Qazaqstan Respýblıkasynyń Elshiligi men Shanhaı jáne Gonkongtaǵy Qazaqstannyń bas konsýldyqtarynda Atom elektr stansasyn (AES) salý jónindegi respýblıkalyq referendýmǵa daýys berý pýnktteri ashyldy.
Ózbekstan astanasynda ornalasqan Qazaqstan elshiliginiń janyndaǵy referendým ýchaskesi jergilikti ýaqyt boıynsha saǵat 07:00-de óz jumysyn bastady.
