Máskeýde 80 sm qar jaýdy: 72 jyldaǵy rekord tirkeldi
MÁSKEÝ. KAZINFORM — Máskeýde qar jamylǵysynyń bıiktigi 80 sm-ge jetip, sońǵy 72 jyldaǵy meteobaqylaýlar boıynsha absolıýttik rekord tirkeldi. Bul kórsetkishti MGÝ ımenı M. V. Lomonosova janyndaǵy meteorologııalyq observatorııa anyqtaǵan. Bul týraly TASS agentigi jazdy.
20 aqpanda observatorııa 72 jyldyq baqylaý tarıhyndaǵy eń joǵary qar qalyńdyǵyn – 80 sm-di tirkedi. Sonymen qatar, Máskeýdiń Vnýkovo aýdany ótken táýlikte jaýyn-shashyn eń kóp túsken álemdegi bes aımaqtyń qataryna engen. Bul týraly Dúnıejúzilik meteorologııalyq uıym habarlady.
Qardan keıingi qarbalas
19 aqpanǵa qaraǵan túni Máskeý óńirine Adrıatıka teńiziniń soltústiginen Ortalyq Reseıge jetken tsıklon áserinen qalyń qar jaýdy. Sınoptıkter 19 aqpan kúni tańǵy 03:00-den keshki 21:00-ge deıin 25 mm-ge deıin jaýyn-shashyn túsip, qar qalyńdyǵy 25–31 sm-ge artýy múmkin ekenin boljaǵan.
Tabıǵı qubylysqa deıin VDNH aýmaǵyndaǵy negizgi meteostantsııada osy kúz-qys maýsymynda qar jamylǵysy 43 sm bolǵan.
Qatty qarǵa baılanysty Máskeý men Podmoskovede jarııalanǵan aýa raıynyń «qyzǵylt sary» deńgeıdegi qaýiptilik rejımi keıin «sary» deńgeıge tómendetildi. Bul týraly Reseıdiń Gıdrometortalyǵy málimdedi.
Áýejaılar jumysy
19 aqpanda Máskeý avıatsııalyq torabyndaǵy Sheremetevo, Vnýkovo, Domodedovo jáne Jýkovskıı áýejaılary qar men qatty jel jaǵdaıynda 1 026 reıske qyzmet kórsetti.
Qosymsha 8 ushaq qosalqy áýeaılaqtarǵa qondy, 40 reıs, onyń ishinde 7 sheteldik áýe kompanııasynyń reısi toqtatyldy. Bul týraly Rosavıatsııa habarlady.
Joldaǵy jaǵdaı
Keshki qarbalas ýaqytta Máskeý joldaryndaǵy keptelis deńgeıi 10 baldyq shkala boıynsha 9 balǵa jetti. Mundaı derekterdi «ıAndeks keptelis» qyzmeti kórsetti.
Qar tazalaý jumystary qalaı órbidi
Qar tazalaý jumystaryna Máskeýdiń kommýnaldyq arnaıy tehnıkasynyń tolyq parki jumyldyryldy. Qala ákiminiń orynbasary Petr Bırıýkovtyń aıtýynsha, negizgi magıstraldar, kósheler, jaıaý júrginshiler aımaqtary men aýlalar tazartylýda, jınalǵan qar arnaıy oryndarǵa shyǵaryldy.
Kópqabatty úılerdiń shatyrlary men qasbet elementteri, sý aǵar naýalar qar men muzdan tazartylyp jatyr. Jumys aımaqtary qorshaýǵa alynyp, jaıaý júrginshilerdiń ótýine shekteý qoıylǵan.
Injenerlik kompanııalar men ákimshilik okrýgterdiń apattyq brıgadalary táýlik boıy kezekshilik etýde. Máskeý aınalma avtojolynda (MKAD) jáne TıNAO aýmaǵynda aýyr júk kólikterine kómektesý úshin tartqyshtar men avtokrandar kezekshilikke qoıylǵan.
Temirjol ınfraqurylymy
Ótken túnde Máskeý temirjol jelisinde shamamen 2 myń shaqyrym jol qardan tazartyldy. Jumysqa 1,7 myńnan astam adam jáne 103 arnaıy tehnıka birligi tartylǵan. Búgin jelige 132 qar tazalaý mashınasy shyǵaryldy.
Temirjol ınfraqurylymyn tazalaý jumystary arnaıy shtabtyń úılestirýimen júrgizilgen.
Buǵan deıin Máskeýge jaýǵan qalyń qardan keptelis údep, taksı baǵasy sharyqtaǵanyn jazǵan edik.