Máskeýde 8 adam qaza tapqan ekskýrsııany uıymdastyrýshylar ishinde Qazaqstan azamaty bar

MÁSKEÝ. QazAqparat - Máskeýdiń jerasty káriz kollektoryna qaıǵyly ekskýrsııa uıymdastyrǵandar kinásin moıyndamady. Bul týraly Máskeý prokýratýrasynyń baspasóz qyzmetinen málim boldy, dep habarlaıdy QazAqparattyń menshikti tilshisi.

Máskeý prokýratýrasynyń málimetinshe, «Spýtnık» jaýapkershiligi shekteýli seriktestiginiń 35 jastaǵy bas dırektory Aleksandr Kım men 31 jastaǵy Nıkıta Dýbas ustalǵan.

«Olarǵa RF Qylmystyq kodeksiniń 238-baby 3-bóligi boıynsha aıyp taǵyldy. Olar kinásin moıyndamady», - dedi prokýratýra.

Reseıdiń tergeý komıtetiniń málimetinshe, 20 tamyzda ekskýrsovod 7 adamnan turatyn toppen birge Máskeýdegi Neglınka ózeniniń jerasty kollektoryna zańsyz ekskýrsııa uıymdastyryp, saldarynan adamdar qaza tapqan.

Sonyń ishinde kámeletke tolmaǵan eki bala jáne gıd bar. Tergeýshiler osy ekskýrsııany uıymdastyrýǵa qatysy bar úsh adamdy anyqtady.

Qylmystyq is boıynsha aıyptalýshylar qatarynda ustalǵandardan bólek, 21 tamyzda Birikken Arab Ámirlikterine ushyp ketken «Avangard» ekskýrsııalyq bıýrosynyń bas dırektory Aleksandr Lazovskıı de bar.

Reseılik BAQ habarlaǵandaı, Aleksandr Kım - Qazaqstan azamaty, 2006 jyly Reseıge ketkenge deıin Konaev qalasynda turǵan.

Sankt-Peterbýrgte ol búkil álem boıynsha ekskýrsııa brondaý úshin startap jasaǵan. Qazir ol tergeýge baılanysty Máskeýde.

Qazaqstannyń Reseıdegi elshiligi jaǵdaıdyń baqylaýda, konsýldyq qyzmetkerleri advokattarmen baılanysta ekenin habarlady.

Qajet bolǵan jaǵdaıda azamatymyzdyń zańdy quqyqtary men múddesin qorǵaý maqsatynda konsýldyq qoldaý kórsetedi.

Buryn habarlanǵandaı, qatysýshylary iz-túzsiz joǵalǵan zańsyz ekskýrsııa Máskeýde 20 tamyzda bolǵan.

Qatty jańbyr bastalǵanda sý kúrt kóterilip, týrısterdiń jer betine qashyp shyǵýǵa múmkindigi bolmady.

Segiz adam qaza tapty, olardyń denesi Neglınka ózeninen tabyldy. Mundaı nysandarǵa tek arnaıy qyzmet qyzmetkerleri ǵana kire alady.