Máskeýde 28 sáýirge deıin sary qaýip deńgeıi jarııalandy
ASTANA. KAZINFORM – Máskeý men Máskeý oblysynda 28 sáýir keshine deıin aýa raıyna baılanysty «sary» qaýip deńgeıi engizildi, dep habarlaıdy TASS.
Reseı Gıdrometortalyǵynyń málimetinshe, bul eskertý jaýyn-shashynnyń kúsheıýi, qar aralas jańbyrdyń jaýýy, kóktaıǵaqtyń paıda bolýy jáne jeldiń kúsheıýine baılanysty jarııalanǵan.
– Sary deńgeı 28 sáýir kúni tańǵy 09:00-ge deıin kúshinde bolady. Keı jerlerde jaýyn-shashyn kúsheıip, qar aralas jaýyn elektr jelileri men aǵashtardy zaqymdap, joldarda kóktaıǵaq qalyptasýy múmkin, – dedi vedomstvo ókili.
Sınoptıkterdiń boljamynsha, aldaǵy táýlikte Máskeýde jaýyn-shashyn jalǵasyp, jańbyr birtindep qarǵa ulasady. Dúısenbi kúni negizinen qar túsýi kútiledi. Sonymen qatar jeldiń ekpini 15-20 m/s-qa deıin kúsheıedi.
Meteorologtardyń deregine sáıkes, aldaǵy kúnderi qar jamylǵysy 2-7 santımetrge deıin ulǵaıýy múmkin.
Aýa raıynyń kúrt nasharlaýyna Baltyq tsıklondarynyń áseri sebep bolyp otyr. Sonyń saldarynan atmosferalyq qysymnyń tómendeýi de yqtımal.
Qala bıligi turǵyndarǵa qolaısyz aýa raıy kezinde saqtyq sharalaryn saqtaýǵa shaqyrdy. Atap aıtqanda, aǵashtardyń astynda turmaý, kólikterdi olardyń mańyna qoımaý jáne jolda jyldamdyq rejımin saqtaý usynyldy.
Aıta keteıik, jaqynda Túrkııada nóser jaýynnan soń birneshe provıntsııany sý basyp qalǵan.
