Máskeýde 10 jyl jóndeýden ótken Eýropadaǵy iri meshit ashylady
ASTANA. QazAqparat - Máskeýde búgin Qurban aıt qarsańynda on jyl aýqymdy jóndeýden ótkennen keıin Sobor meshiti ashylýda. Meshit kesheni alańyn 19 myń sharshy metrge jetkizip, 20 esege ulǵaıtqannan keıin reseılik astanadaǵy musylmannyń qasıetti orny Eýropanyń eń iri meshitine aınaldy, dep habarlady TASS.
Meshitti ashý bastapqyda 2016 jylǵy mamyr aıyna josparlanǵan. Alaıda Uly Jeńistiń 70jyldyǵyn merekeleý jylyndaǵy rásimdi ótkizýge úlgerý úshin jumystardy jedeldetý qajet boldy. «Bul 111 jyldan beri esigi jabylmaı, qyzmet etip kele jatqan meshit, ony jańartýymyz bizdiń ardagerlerge, Otan qorǵaýshylarymyzǵa degen qurmet dep bilemin», - dedi suhbatynda Reseı Múftıler keńesiniń tóraǵasy Ravıl Gaınýtdın.
Máskeý sobor meshiti 1904 jyly salynǵan. Keńes kezeńinde ol jabylmaı, astanada qyzmetin jalǵastyrǵan jalǵyz meshit bolatyn. Apatty dep tanylǵan meshittiń jóndeý jumystary 2005 jyly bastalǵan, shatyry kez kelgen ýaqytta qulap qalýy múmkin edi, ıaǵnı «Qulshylyq etýshilerdi meshitte qabyldaý qaýipti boldy», dep málimdedi TASS tilshisine Gaınýtdın.
Endi meshitte bir ýaqytta 10 myń adam namaz oqı alady. Alaıda bul musylmandardyń meshit mańynda májbúrli qulshylyq etý máselesin sheshpeıdi, sebebi qalada 2 mln jýyq musylman bar. Al meshit ne bári altaý ǵana.
Jobany iske asyrýǵa 170 mln. dollar jumsaldy. Qarajattyń basym bóligi - qarapaıym qulshylyq etýshilerdiń qaıyrymdylyq kómegimen jınaldy. Kásipker Sýleıman Kerimov demeýshilik kórsetti. Túrkııa prezıdenti esik, aspasham, kilemder syıǵa tartty. Budan basqa, túrik sheberleri dızaın, árleý jumystaryn óteýsiz oryndap berdi.
Meshittiń ashylýyna Reseı Múftıler keńesi myńdaǵan qaıyrymdylyq jasaýshylardyń esimderi jazylǵan Altyn kitapty jaryqqa shyǵardy.
