Máskeý jurtshylyǵy «Qazaq handyǵy. Almas qylysh» fılmin tamashalady
ASTANA. QazAqparat - Máskeýdegi Tretıakov galereıasynda "Qazaq handyǵy. Almas qylysh" fılminiń arnaıy kórsetilimi boldy, dep habarlaıdy QazAqparat tilshisi.
Kórsetilim aıasynda qazaqstandyq jýrnalısterge suhbat bergen kartına rejısseri Rústem Ábdirashovtiń aıtýynsha, bul týyndy búginde tek Qazaqstanda ǵana emes sonymen birge shetelde de tanymal bolyp kele jatyr.
"Bul "Qazaq handyǵy. Almas qylysh" fılminiń sheteldegi alǵashqy kórsetilimi. Degenmen, fılmniń orys tilindegi nusqasyn YouTube-ke salǵan edik jáne ol bir aıdyń ishinde mıllıonnan astam kórilim jınap otyr. Biz úshin bul óte úlken kórsetkish. Fılmge oń baǵa berilýde jáne álemniń túkpir-túkpirinen, Túrkııadan, Reseıden, Aýǵanstannan, Irannan, Latyn Amerıkasy elderinen jaqsy pikirler túsýde. Túrli elderdiń azamattarynyń qazaqtyń, túrkilerdiń tarıhyna, jalpy kóshpelilerdiń órkenıetine qyzyǵýshylyq tanytyp otyrǵandyǵy qýantady. Óıtkeni, tarıhy 550 jyldan asyp jyǵylatyn Qazaq handyǵynyń, uly kóshpeli túrki órkenıetiniń tarıhtaǵy orny erekshe. Sonymen qatar ol búkálemdik órkenıettiń de damýyna aıtarlyqtaı úles qosatyndyǵy belgili", - dedi Rústem Ábdirashov.
Osy rette ol fılmniń birinshi bólimi úlken jobanyń bastamasy ǵana ekendigin basa aıtty.
"Taıaýda ǵana "Almas qylyshtyń" jalǵasy sanalatyn "Qazaq handyǵy. Altyn taq" dep atalatyn ekinshi bóligin túsirýdi aıaqtadyq. Jaqyn arada onyń tusaýkeseri ótedi. Sondyqtan muny úlken jobanyń bastaýy ǵana desek te bolady", - dedi ol.
Týyndy prodıýseri Arman Asenov qazaq fılmin búginde sheteldik kórermender tanymal "Taqtar oıyny" serıalymen salystyryp jatqandyǵyn basa aıtty.
"Bul fılmdi 180-nen astam el satyp alýǵa qyzyǵýshylyq tanytyp otyr. Ol birinshi jáne ekinshi maýsymdaǵy 10 serııa men 2 kıno nusqany qamtıdy.
Aıta keterligi, eń aldymen Latyn Amerıkasy elderi qyzyǵýshylyq tanytýda. Olar bul týyndyny "Taqtar oıynymen" salystyrýda", - dedi ol.
Tarıhı jobanyń avtory - QR Prezıdenti N. Nazarbaev. Fılm QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ «Centaurus Rustem Abdrashev production» JShS-nyń qatysýymen túsirilgen. Fılm stsenarııin jazýshy Smaǵul Elýbaı Іlııas Esenberlınniń «Almas qylysh» romanynyń jelisi boıynsha daıyndaǵan. Túsirý jumystary Almaty qalasy jáne Almaty oblysy aýmaǵynda, jarty bóligi «Qazaqfılm» kınostýdııasynda jasalǵan dekoratsııada ótken. Onda sýretshiler Shaıbanshahtyń saraıyn jasaǵan.
«Almas qylyshty» túsirýge eki jyl ýaqyt ketken. Fılmge 500 adam tartylǵan. Onyń 200-i túsirilim tobynyń músheleri. Naqty túsirý jumystary 30-ǵa jýyq nysanda bes aı boıy júrgen. Fılm bıýdjeti 2 mlrd teńgege jetken. Salyqtarymen eseptegende 5 mln dollar jumsalǵan.
Avtory: Medet Ahmetov
