Máskeý jáne búkil Rýs Patrıarhy Kırıll Astanada jańadan salynǵan Ýspen kafedraldyq soborynda boldy
ASTANA. Qańtardyń 17-si. QazAqparat /Aıdar Ospanalıev/ - Búgin Máskeý jáne búkil Rýs Patrıarhy Kırıll Astanada jańadan salynǵan Ýspen kafedraldyq soborynda bolyp, ondaǵy qasıetti, áýlıe Uly Vasılııdiń qurmetine dáripteý lıtýrgııasy rásimin ótkizdi,
dep habarlaıdy QazAqparat.
Sharaǵa Astana ákimi Imanǵalı Tasmaǵambetov pen Syrtqy ister mınıstriniń orynbasary Nurtaı Ábiqaev jáne dindar azamattar men jergilikti pravoslav jolyn ustanatyn hrıstıan dininiń ókilderi, sondaı-aq jýrnalıster qatysty. Rásim barysynda Ýspen kafedralyq soborynyń qyzmetkerleri Orys Pravoslav shirkeýiniń basshysyna osy sapary úshin alǵystaryn bildirdi. Olar shirkeýdiń boı kóterýine baılanysty ózderiniń qazaqstandyqtarǵa degen jyly lebizderin bildirdi. Shirkeý ókilderi Qazaqstannyń bir kezderi Keńes ókimetiniń tusynda elimizge syrttan májbúrli túrde qonys aýdyralǵan kóptegen azamattardy qushaq jaıa qarsy alǵan kóńili darqan, qonaqjaı el ekendigin atap ótti. Sondaı-aq olar shirkeýdiń boı kóterýine kóptegen qazaqstandyq azamattardyń úlken úles qosqandyǵyn jetkizdi.
Óz kezeginde búgingi sharanyń mán-mańyzyna toqtalǵan mártebeli meıman Qazaqstan Prezıdenti men qazaq halqyna osyndaı ónegeli isteri úshin zor alǵysyn bildirip, shirkeýdiń barqatar laýazym ıelerin arnaıy ordendermen marapattady. Sondaı-aq ol shirkeýdiń boı kóterýine úles qosqan birqatar Qazaqstandyq azamattardy da arnaıy ordendermen marapattap, syı-syıapat jasady.
