Máskeý jáne búkil Rýs Patrıarhy Kırıll Almatyǵa keldi
ASTANA. Qańtardyń 17-si. QazAqparat - Máskeý jáne búkil Rýs Patrıarhy Kırıll Astanadan Almatyǵa keldi. Orys Pravoslav shirkeýiniń basshysy Qazaqstanǵa Elbasy Nursultan Nazarbaevtyń shaqyrýymen keldi.
Jergilikti eparhııa ókilderiniń aıtýynsha, Mártebeli meıman áýejaıdan Abaı atyndaǵy memlekettik akademııalyq opera jáne balet teatryna barady, munda onyń Almaty jurtshylyǵymen kezdesýi josparlanǵan. Budan keıin Qazaqstanǵa alǵash ret kelgen Patrıarh Nıkolsk soborynda qulshylyq rásimderin ótkizedi, munda 1995 jyly Aleksıı ІІ qulshylyq jasaǵan bolatyn. Osy jyldarda Qazaqstanda elde jumys istep turǵan pravoslav hramdary men soborlarynyń úshten ekisi jańartyldy nemese salyndy (qazir olardyń sany 300-ge jýyqtady, alty monastyr ashyldy).
Nıkolsk hramynyń dindarlar úshin orny bólek, oǵan júz jyldan asty. Sobor sáýletshi Sergeı Troparevskııdiń jobasymen salyndy. Tehnıkalyq jobalardy sáýletshi Andreı Zenkov oryndady jáne ol shirkeý qurylysy jumystaryna basshylyq etti. Sobor 1911 jyly 10 balldyq jer silkinisine jáne keńes zamanyndaǵy dinderdi qýdalaýǵa tótep berdi. Voznesen kafedraldyq soborynyń da taǵdyry osy taqylettes, erteń tańerteń onda Patrıarh Kırıldiń qatysýymen qulshylyq lıtýrgııa ótedi.
Orys Pravoslav shirkeýi baspasóz qyzmetiniń málimetteri boıynsha, bıylǵy jyly onyń sheteldik saparlary aýqymdy. Kóktemde ol Armenııada, Ázirbaıjanda jáne TMD-nyń basqa da elderinde bolmaq.
