Máskeý jáne búkil Rýs Patrıarhy Kırıll Almatyda jurtshylyqpen kezdesý ótkizýde
ALMATY. Qańtardyń 17-si. QazAqparat /Elena Ilınskaıa/ - Osy mınýtterde Almatyda Máskeý jáne búkil Reseı Patrıarhy Kırıldiń qala jurtshylyǵymen kezdesýi ótýde.
Orys Pravoslav shirkeýiniń basshysy munda Astanadan keldi. Budan buryn habarlanǵanyndaı, onyń elimizge sapary Elbasy Nursultan Nazarbaevtyń shaqyrýymen uıymdastyrylǵan. Patrıarhtyń qasyna Astana jáne Almaty mıtropolıti Mefodıı erip júr.
Kezdesý Abaı atyndaǵy Qazaq memlekettik akademııalyq opera jáne balet teatrynda ótýde. Onyń kórermender zalynda dybystyń estilýi jaqsy. Onyń ústine ǵımarat eldiń tarıhı mádenıet jáne sáýlet eskertkishi. Ol Uly Otan soǵys jyldaryna «Qazgor» jobalaý akademııasynyń mamandarynyń jobasymen salynǵan. Munda klassıkalyq qazaq ulttyq mádenıetiniń dástúrleri mol paıdalanylǵan. 2008 jyly munda kúrdeli jańartý jumystary júrgizildi. Teatrdyń kórermender zaly 800 orynǵa eseptelgen.
Zal lyq toly. Máskeý jáne búkil Rýs Patrıarhy Kırıldiń saparynyń kópultty Qazaqstan úshin erekshe mańyzy zor. Kezdesýge jınalǵandardyń arasynda elimizdiń birinshi hanymy Sara Nazarbaeva da bar.
Osy kezdesýden keıin Patrıarh Kırıll Nıkolsk soborynda qulshylyq rásimin ótkizedi, munda 1995 jyly Aleksıı ІІ duǵa oqyǵan. Osy jyldary Qazaqstanda eldegi jumys jasap turǵan pravoslav hramdary men soborlarynyń úshten ekisi jańartyldy (qazir olardyń sany 300-ge jýyqtaıdy, alty monastyr ashyldy).
Nıkolsk hramynyń dindarlar úshin orny bólek, oǵan júz jyldan asty. Sobor sáýletshi Sergeı Troparevskııdiń jobasymen salyndy. Tehnıkalyq jobalardy sáýletshi Andreı Zenkov oryndady jáne ol shirkeý qurylysy jumystaryna basshylyq etti. Sobor 1911 jyly 10 balldyq jer silkinisine jáne keńes zamanyndaǵy dinderdi qýdalaýǵa tótep berdi. Voznesen kafedralyq soborynyń da taǵdyry osy taqylettes, erteń tańerteń onda da Patrıarh Kırıldiń qatysýymen qulshylyq lıtýrgııa ótedi. Sol kúni Patrıarhty Elbasy Nursultan Nazarbaev qabyldaıdy.
