Máskeý jańa Damaskpen baılanys ornatty: Asad rejımi qulaǵannan keıingi alǵashqy sapar

ASTANA. KAZINFORM – Reseı delegatsııasy Bashar Asad taqtan taıdyrylǵannan keıin Sırııanyń jańa ákimshiligimen alǵashqy kelissózderin ótkizip, senimdi qalpyna keltirý men Máskeýdiń aımaqtaǵy áskerı bazalarynyń bolashaǵyn talqylady.

Reseı Syrtqy ister mınıstriniń orynbasary Mıhaıl Bogdanov bastaǵan Reseı delegatsııasy seısenbi kúni Damaskige bardy. Bul - ótken jyldyń jeltoqsanynda burynǵy prezıdent Bashar Asad taqtan taıdyrylǵannan keıingi Máskeýdiń Damaskige jasaǵan alǵashqy resmı sapary. 

Máskeýden barǵan delegatsııa Damaskide Sırııanyń jańa ákimshiliginiń jetekshisi Ahmed ash-Sharaamen kelissózder júrgizdi. Delegatsııa quramynda Reseı Syrtqy ister mınıstriniń orynbasary Mıhaıl Bogdanov pen Reseı prezıdentiniń Sırııa boıynsha arnaıy ókili Aleksandr Lavrentev boldy, dep habarlaıdy RIA Novostı.

Senimdi qalpyna keltirý

Kezdesý barysynda Sırııanyń egemendigi men aýmaqtyq tutastyǵyn qurmetteý rastaldy, dep habarlaıdy sırııalyq SANA aqparat agenttigi. Reseı tarapy Sırııada bolyp jatqan oń ózgeristerdi qoldaıtynyn málimdegen.

Agenttiktiń habarlaýynsha, Reseı Damaskiniń qalaýyna sáıkes «ótemaqy, qaıta qurý jáne qalpyna keltirý» arqyly senimdi tikteı alady.

– Dıalog barysynda ótemaqy, qaıta qurý jáne qalpyna keltirý sııaqty naqty sharalar arqyly Sırııa halqymen senimdi qalpyna keltirýdegi Reseıdiń róli erekshe atap ótildi, – dep málimdedi agenttik.

Sırııanyń jańa ákimshiligi eldiń ádilettilikke, abyroı men egemendikke negizdelgen bolashaǵyn qurý úshin barlyq múddeli taraptarmen prıntsıpti qarym-qatynasqa degen tabandylyǵyn rastady.

Damask bıligi qarym-qatynastardy qalpyna keltirý úshin burynǵy qatelikterdi eskerip, Sırııa halqynyń erkin qurmettep, olardyń múddelerine qyzmet etý kerektigin basa aıtty.

Reseıdiń Sırııadaǵy áskerı bazalary

Kezdesýden keıin reseılik tarap Sırııadaǵy áskerı bazalaryn saqtaý máselesi qosymsha konsýltatsııalardy qajet etetinin málimdedi.

– Eshteńe ózgergen joq. Bul másele qosymsha kelissózderdi qajet etedi. Biz yntymaqtastyǵymyzdyń árbir salasy boıynsha tereńirek konsýltatsııalardy jalǵastyrýǵa kelistik, – dedi RF Syrtqy ister mınıstriniń orynbasary Mıhaıl Bogdanov.

Delegatsııanyń úsh saǵattan astam ýaqytqa sozylǵan jańa ákimshilikpen «konstrýktıvti» kelissózder júrgizgenin atap ótken Bogdanov Reseı tarapynyń «Sırııa birligi, aýmaqtyq tutastyǵy men egemendigin qoldaıtynyn» rastaǵanyn aıtty.

Onyń aıtýynsha, reseılik tarap Sırııadaǵy máselelerdi «ınklıýzıvti saıası dıalog» arqyly sheshý qajettigin atap ótken.

Bogdanov Sırııa Syrtqy ister mınıstri Asad ál-Shaıbanı Reseıge kelse, Máskeý ony qýana qarsy alatynyn aıtty.

Búginde Máskeý Sırııadaǵy eki bazasyn: Tartýstaǵy áskerı-teńiz nysany men Latakııa porty mańyndaǵy Hmeımım avıabazasyn saqtap qalýǵa úmitti.

Qańtar aıynda sırııalyq Al Watan gazeti Sırııanyń ýaqytsha úkimeti Tartýs portyn basqarý jónindegi reseılik STG Stroytransgaz kompanııasymen kelisimshartty buzǵanyn habarlaǵan.

Kelisimshart kompanııanyń ınfraqurylymǵa ınvestıtsııalardy qamtıtyn 2019 jylǵy mámileniń sharttaryn oryndamaýyna baılanysty toqtatylǵan.

Bul sheshim bólek kelisim boıynsha jumys isteıtin jáne Reseıdiń Jerorta teńizindegi jalǵyz áskerı-teńiz bazasy bolyp tabylatyn Tartýstaǵy qoldanystaǵy Reseı áskerı-teńiz bazasyna áser etken joq.

2024 jyly jeltoqsanda Sırııa prezıdenti Bashar Asad bılikten taıdyrylǵannan keıin Reseı oǵan baspana berdi.

Sırııadaǵy reseılik kontıngent Latakııa mańyndaǵy Hmeımım áýe bazasyna qaıta ornalastyryldy.