Máskeý ýnıversıteti túlekteriniń kóbi Qazaqstanda jumys isteıdi
ASTANA. QazAqparat - Parlament Májilisiniń jalpy otyrysynda «QR Úkimeti men RF Úkimeti arasyndaǵy M.V. Lomonosov atyndaǵy Máskeý memlekettik ýnıversıtetiniń Qazaqstandyq fılıalynyń jumys isteýi týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.
Eske salsaq, 2000 jyly QR Tuńǵysh Prezıdenti Nursultan Nazarbaev M.V. Lomonosov atyndaǵy Máskeý memlekettik ýnıversıtetiniń Qazaqstandaǵy fılıalyn ashý jóninde bastama kóterdi. Sol jyly 9 qazanda RF Prezıdenti V. Pýtınniń Qazaqstanǵa sapary kezinde fılıaldyń qurylýy týraly hattamaǵa qol qoıyldy. Fılıal osy ýaqytqa deıin L.N. Gýmılev Eýrazııa ulttyq ýnıversıtetiniń bazasynda jumys jasaýda. Qazaqstandyq fılaldyń qyzmetin odan ary zańnamalyq turǵyda bekitý maqsatynda 2017 jylǵy 9 qarashada Chelıabınsk qalasynda QR Úkimet men RF Úkimeti arasynda M.V. Lomonosov atyndaǵy Máskeý memlekettik ýnıversıtetiniń qazaqstandyq fılıalynyń jumys isteýi týraly kelisimge qol qoıyldy.
«Osy kelisim fılıaldyń jumys isteýin retteıdi. Onda oqytý Máskeý memlekettik ýnıversıtetiniń oqý baǵdarlamalary negizinde júzege asyrylady. Sonymen birge, kelisimde Qazaqstannyń joǵary oqý oryndarynda kózdelgen kólemde Qazaqstan tarıhy men qazaq tilin mindetti túrde oqytý qarastyrylǵan. Budan basqa, oqý josparlarynda Qazaqstan ekonomıkasynyń erekshelikteri eskerilgen. Birinshi jáne ekinshi kýrstarda Qazaqstandy jańǵyrtýdyń ózekti máseleleri týraly áleýmettik-gýmanıtarlyq pánder oqytylady» - dedi QR Bilim jáne ǵylym mınıstri Kúlásh Shámshıdınova.
Qazaqstan fılıalynyń qyzmetine múlikti óteýsiz berý jáne bilim granttaryn bólý arqyly qatysady. Fılıal múlikti eshkimge bere almaıdy, onyń qyzmeti aıaqtalǵan jaǵdaıda, múlik Qazaqstanǵa qaıtarylady.
«Jyl saıynǵy qabyldaý jospary 125 stýdent, 40 magıstrantty quraıdy. Búginde fılıalda 605 stýdent bilim alady. Fılıal jeke zańdy tulǵa bolyp eseptelmeıdi, sondyqtan Máskeý ýnversıtetiniń lıtsenzııalary men akkredıtatsııasy negizinde jumys isteıdi. Osyǵan baılanysty kelisimde fılıaldyń bilim berý jáne qarjy-sharýashylyq qyzmetin baqylaý úshin vedomstvolyq komıssııasy kózdelgen. Fılıal qyzmeti 3 jylda bir ret tekseriledi, sondaı-aq Qazaqstan zańnamasynda belgilengen ózge de tekserýler ótkizýge bolady», - dedi mınıstr.
Onyń sózine qaraǵanda, kelisimniń 12-shi babyna sáıkes, hattama arqyly osy kelisimge ózgerister engizý múmkindigi bar jáne bul ózgerister qujattyń ajyramas bóligi bolady.
«Oqýdy sátti aıaqtaǵan stýdentterge Máskeý memlekettik ýnıversıtetiniń dıplomy beriledi. 390 professor men oqytýshynyń 130-y bas ýnıversıtetten tartylady. 14 jyl ishinde 1 725 maman daıarlanyp shyqty. Monıtorıng nátıjelerine qaraǵanda, sońǵy 5 jylda túlekterdiń 93 paıyzy Qazaqstanda jumysqa ornalasty. Qazaqstan zańnamasyna sáıkes, fılıal túlekteriniń mindetti túrde jumys óteý qajettigi kelisimde bekitilgen», - dedi Kúlásh Shámshıdınova.
