Máskeý soty «BTA Bankten» 13,8 mlrd rýbl jymqyrǵan A. Bondarenkonyń isin qaraıdy

ASTANA. QazAqparat - Reseı Federatsııasynyń Bas prokýrorynyń orynbasary Vıktor Grın sotqa somasy 13,8 mlrd rýblden asatyn alaıaqtyq týraly qylmystyq isti joldady.

«2016 jyly 30 maýsymda, Reseı Federatsııasynyń Bas prokýrorynyń orynbasary Vıktor Grın «Evrazııa Logıstık»  JShQ burynǵy qarjy dırektory Artem Bondarenkoǵa qatysty qylmystyq is boıynsha  aıyptaý qorytyndysyn bekitti. Ol RF QK  159 baby 4 bóliminde qarastyrylǵan qylmys (alaıaqtyq) jasady dep aıyptalýda.

Tergeý nusqasy boıynsha, 2007 jyly Bondarenko uıymdasqan top quramynda nesıe komıtetiniń músheleri men «BTA Bank» AQ ózge qyzmetkerlerin aldap, bankten somasy 8,3 mlrd rýblden asatyn múlki jáne  5,4 mlrd rýblden astam qarajatyn jymqyrdy.

Sybaılastaryna qatysty tergeý jalǵasyp jatyr», - dep habarlaıdy  RF Bas prokýratýrasynyń baspasóz qyzmetinen.

Qylmystyq is qaralý úshin Máskeý oblysynyń  Domodedovo qalalyq sotyna joldandy.