Máskeý soty Google-ǵa taǵy 15 mln rýbl aıyppul saldy
ASTANA. KAZINFORM — Máskeý soty Reseıde tyıym salynǵan kontentti joımaǵany úshin Google-ǵa aıyppul taǵaıyndady. Bul týraly Anadoly agenttigi jazdy.
Máskeýdiń Tagan aýdandyq soty Google kompanııasyna tyıym salynǵan kontentti óshirmegeni úshin taǵy 15 mln rýbl aıyppul saldy.
— 2026 jylǵy 5 mamyrdaǵy Máskeý qalasynyń Tagan aýdandyq sotynyń qaýlylaryna sáıkes Google LLC Reseı Federatsııasynyń Ákimshilik quqyq buzýshylyq týraly kodeksiniń 13.41-baby 2-bóligi boıynsha (zańnamaǵa sáıkes qoljetimdiligi shektelýi tıis aqparat pen aqparattyq resýrstarǵa qol jetkizýdi shekteý tártibin buzý) 4 ákimshilik quqyq buzýshylyq jasaǵany úshin kináli dep tanyldy. Árbir quqyq buzýshylyq boıynsha sot ákimshilik aıyppul túrinde jaza taǵaıyndady, olardyń jalpy somasy 15,2 mln rýbldi qurady, — dep habarlady TASS agenttigine sot otyrysyna qatysýshy.
Osy jyldyń naýryz aıynyń sońynda Google osyǵan uqsas bap boıynsha taǵy 3,8 mln rýbl aıyppul tóleýge mindettelgen bolatyn. Al sáýir aıynda sot kompanııaǵa dál osyndaı quqyq buzýshylyq úshin 19 mln rýbl aıyppul salǵan.
Sońǵy jyldary Telegram, Facebook, Twitter jáne TikTok sııaqty iri ınternet-servıster de Reseıde tyıym salynǵan kontentti joımaǵany úshin birneshe ret jaýapkershilikke tartylǵan.
Eske sala keteıik, buǵan deıin EO Google-diń ústemdigin shekteý úshin izdeý júıesindegi derekterdi bólisýdi talap etetinin jazdyq.
