Máskeý Sırııa kelissózderiniń Astanada ótkizilý sebebin aıtty

ASTANA. QazAqparat - QR Syrtqy ister mınıstri Qaırat Ábdirahmanovpen kelissózderdiń qorytyndysyna oraı ótken baspasóz máslıhatynda Reseı Syrtqy ister mınıstri Sergeı Lavrov Sırııa boıynsha kelissózder ótkizý alańy retinde Astananyń tańdap alyný sebebin aıtty, dep habarlaıdy QazAqparattyń Máskeýdegi arnaýly tilshisi Medet Ahmetov.

«Sırııalyq daǵdarysty retteý bastalǵan sátten-aq Qazaqstan onyń tabysty bolýyna járdemdesýge umytylyp keledi. Sırııaaralyq kelissózderdi bastaýǵa alań daıyndaý kezinde kelissózderge Sırııa úkimetimen qatar oppozıtsııanyń barlyq sektoryn qamtý úshin bul protsestiń ınklıýzıvti sıpatyn qamtamasyz etý mindeti turdy», - dedi Lavrov.

Onyń túsindirýinshe, Sırııa oppozıtsııasy shashyrańqy boldy. Negizinen, shetelde turyp jatqan oppozıtsıonerler belsendilik tanytty. Sondyqtan olardyń basyn qosyp, úkimetpen suhbattasýǵa daıyn bolýyn qamtamasyz etý mindeti alda turdy. Al bul baǵytta birqatar el kúsh jumsap, úlken is atqardy.

«Saýd Arabııasy ózderi yntymaqtastyqta bolǵan oppozıtsıonerlerdi biriktirýde úlken jumys atqardy jáne «er-rııadtyq» dep atalatyn top paıda boldy. Dál osyndaı isti mysyrlyq áriptester de atqaryp, «kaırlyq» top paıda  bolǵan edi. Mundaı isti bizde atqaryp, «máskeýlik» oppozıtsonerler toby quryldy. Bul bastamalardy damytý úshin bizdiń qazaqstandyq dostarymyz óz úlesin qosyp, «ózderiniń shatyry» astynda kezdeýge daıyn oppozıtsonerlerdi jınady. Osylaısha «Astana» toby quryldy», - dedi Lavrov.

Onyń aıtýynsha, bul toptar buǵan deıin sırııaaralyq kelissózderdiń birinshi raýndyna qatysqan bolatyn. Alaıda, ókinishke oravı, sáýir aıynda bul kelissózder tuıyqqa tirelgen.

«Qarym-qatynasty qalpyna keltiretin bul protsesti qaıda jalǵastyrý qajet degen kezde bul kelissózge qatysýshylardyń barlyǵy da ońtaıly oryn retinde Qazaqstan elordasy - Astanany eske aldy. Astana múmkinshiligi shekteýli emes, óziniń qyzmetin durys usyna alady deýge tolyq negiz bar», - dedi RF Syrtqy ister mınıstri.