Máskeý saparynda Jastar teatry álemdik deńgeıdegi barlyq teatrda óner kórsete alatyndyǵyn dáleldedi - Áshirbek Syǵaı
ALMATY. Sáýirdiń 29-y. QazAqparat /Názıra Eleýhan/ - Mádenıet mınıstrliginiń qoldaýymen Ǵ.Músirepov atyndaǵy Qazaq Memlekettik Akademııalyq balalar jáne jasóspirimder teatrynyń Máskeý qalasyna baryp qaıtqan gastroldik sapary elimizdiń mádenı jáne rýhanı ómirindegi aıtýly oqıǵa boldy.
Bul teatrdyń 47 jyldan keıingi ekinshi sapary. Bul saparda Jastar teatry álemdik deńgeıdegi barlyq teatrda óz ónerin kórsete alatyndyǵyn dáleldedi. Bul týraly búgin Almatyda atalmysh teatrdyń Reseı astanasynan gastroldik sapardan oralýyna oraı uıymdastyrylǵan baspasóz máslıhatynda Memlekettik syılyqtyń laýreaty, teatr synshysy, professor Áshirbek Syǵaı málimdedi, dep habarlaıdy QazAqparat.
Onyń aıtýynsha, barlyq qoıylymdar anshlagpen ótken. «Kórermender turyp qoshemet kórsetti. Barlyǵy qazaq ártisteriniń ónerine tántti boldy, men birde -bir syn estigen joqpyn. Keńes Odaǵy ydyraǵannan keıin, baılanysymyz azaıyp, qazaq ónerinen beıhabar qalǵan el bizdi qalaı qabyldar eken, kórermenderdiń kóńilinen shyǵa alamyz ba ba dep oılaǵan edik. Qoıylymdar da, sapar da men oılaǵannan jaqsy ótti. Máskeý jurtshylyǵy ystyq yqylaspen qabyldady. Qoıylym kezinde, janymda otyrǵan kórermender aýdarmanyń saýatty aýdarylǵanyn aıtyp, rızashylyǵyn bildirdi», dedi ol.
Gastrol Armen Djıgarhanıan basqaratyn Máskeý drama teatrynda ótken. «Teatr 3 qoıylym apardy. Ashylý saltanatynda rejısser Talǵat Temenovtyń «Bulbuldar túni» dramasy, ekinshi kúni onyń «Mýlen-Rýjǵa shaqyrý» lırıkalyq komedııasy qoıyldy. Al, úshinshi kúni Iran- Ǵaıyptyń «Qorqyttyń kóri» dep atalatyn ańyz-dastan qoıylymy kórsetildi. Qoıylymdarǵa orys tilinde ilespe aýdarma berilip otyrdy. Basty rólderde Mýhıtdın Shyntaev, Janar Maqasheva, Jomart Zeınábil syndy bizdiń jas ártisterimiz oınap, ónerlerimen kórermenderdiń kóńilinen shyǵa bildi. Qazaq ártisteriniń ónerin kórýge jáne baǵalaýǵa Reseıdiń halyq ártisteri Roman Vıktıýk, Sergeı Solovev, tanymal teatr rejısseri Kama Gınkas, bárimizge belgili aktrısa Natalıa Arynbasarova, kınorejısser Rashıd Nuǵmanov jáne taǵy da basqa kóptegen óner maıtalmandary keldi», dedi teatrmen gastroldik saparda bolyp qaıtqan teatr synshysy, professor Áshirbek Syǵaı. «Qazirgi ýaqytta Máskeýdiń ózinde 202 teatr bar. Reseı astanasy - búginde rýhanı baǵyt- baǵdar ortalyǵy bolyp otyr», dedi Áshirbek Syǵaı.
