Máskeý-Sankt-Peterbor baǵytyndaǵy «Neva ekspresi» poıyzy apatynda zardap shekkender men qaza tapqandar arasynda Qazaqstan azamattary joq - SІM baspasóz hatshysy
ASTANA. Qarashanyń 28-i. QazAqparat /Marlan Jıembaı/ - Máskeý-Sankt-Peterbor baǵytyndaǵy «Neva ekspresi» poıyzy apatynda zardap shekkender men qaza tapqandar arasynda Qazaqstan azamattary joq.
Bul týraly búgin Syrtqy ister mınıstrliginde ótken baspasóz máslıhatynda atalǵan vedomstvonyń baspasóz hatshysy Іlııas Omarov málim etti, dep habarlaıdy QazAqparat.
І.Omarovtyń aıtýynsha, zardap shekkender men qaza tapqandardyń arasynda Italııanyń 1 ǵana azamaty bolǵan, qalǵandarynyń barlyǵy reseılikter.
«Bizdegi aqparattar boıynsha zardap shekkender arasynda ázirshe Qazaqstan azamattary joq. Osy jaıtqa oraı bizdiń Máskeýdegi konsýldyq bólimge jáne Sankt-Peterbordaǵy bas konsýldyqqa sáıkesinshe tapsyrmalar berildi», dedi І.Omarov.
Aıta keteıik, Novgorod jáne Tver oblystarynyń shekaralarynda juma kúni keshke oryn alǵan «Neva ekspresi» poıyzy apatynyń saldarynan, sońǵy derekter boıynsha 25 adam mert bolyp, 90-ǵa jýyq adam zardap shekti.
