Máskeý sahnasynda qazaq ádebıetiniń klassıgi Tólen Ábdiktiń shyǵarmalary dáripteldi
MÁSKEÝ.KAZINFORM — Qazaqstannyń Reseıdegi Mádenıet kúnderi aıasynda Úlken Ordynkadaǵy Kishi teatr sahnasynda Q.Qýanyshbaev atyndaǵy Qazaq ulttyq mýzykalyq drama teatrynyń «Parasat maıdany» spektakliniń kórsetilimi ótti. Bul týraly Syrtqy ister mınıstrligi málim etti.
Vedomstvonyń málimetinshe, qoıylym qazaq ádebıetiniń klassıgi Tólen Ábdiktiń «Oń qol» jáne «Parasat maıdany» shyǵarmalarynyń negizinde uıymdastyrylǵan.
— Basty keıipker — adamdar arasyndaǵy ádiletsizdikke tótep berýge jáne qoǵamnyń qatal júıesine qarsy turýǵa tyrysady. Shyǵarmada rýhanı qundylyqtar men materıaldyq álem arasyndaǵy qaıshylyqtar, adam tabıǵatynyń kúrdeliligi, sondaı-aq, jaqsylyq pen jamandyqty ajyratý máseleleri kórsetildi, — delingen habarlamada.
Qazaqstannyń Reseıdegi Elshisi Dáýren Abaev atap ótkendeı, bul maǵynasy tereń shyǵarma adamnyń jan dúnıesin túsinýge jáne baǵalaýǵa múmkindik beredi, ómirdiń máni týraly oılandyrady, sondyqtan Máskeý kórermenderine qyzyqty bolýy tıis.
— Biz úshin reseılikterdi qazaq ónerimen tanystyrý óte mańyzdy, osylaısha olar bizdiń qoǵamymyzdy ne tolǵandyratyny týraly túsinik ala alady, — dep atap ótti Elshi.
Óz tarapynan Q.Qýanyshbaev atyndaǵy teatrdyń dırektory Erbol Habylbekov teatr ujymy Máskeýde osy týyndyny usynyp otyrǵandaryna óte qýanyshty ekenin atap ótti.
— Bul juldyzdy akterler quramymen úzdik qoıylym. Premerasy jeltoqsan aıynda ótti jáne úlken qoshemetke ıe boldy. Meniń oıymsha, spektakl tildik kedergige qaramastan, reseılik aýdıtorııaǵa túsinikti bolady, — dedi ol.
Spektakldiń qoıýshy-rejısseri, Qazaqstannyń eńbek sińirgen qaıratkeri Gúlsına Mırǵalıeva osyndaı kúrdeli psıhologııalyq dramaǵa qaramastan, oǵan qoıylymmen jumys isteý ońaı bolǵanyn, óıtkeni ártister onyń ıdeıasyn jaqsy túsinip, júzege asyra alǵanyn aıtty. Onyń aıtýynsha, teatr Reseıge birneshe ret kelse de, ár kezde úlken qýanyshpen oralady.
— Bizdiń teatr mektebimiz ortaq, bir-birimizdiń shyǵarmashylyǵymyz qyzyqty, — dep jalǵastyrdy ol.
Jan dúnıeńdi tolǵandyratyn keremet qoıylym Máskeýdiń qatal jáne talapshyl aýdıtorııasy tarapynan úlken qoshemetke ıe boldy. Spektakl aıaqtalǵannan keıin búkil zal uzaq qol shapalaqtap, kóptegen kórermender qoıylymnyń umytylmas áser qaldyrǵanyn moıyndady. Atap aıtqanda, olar ártisterdiń sheberligi men plastıkasyn, stsenografııany jáne mýzykalyq bezendirýdi joǵary baǵalady. Olardyń aıtýynsha, spektakl mańyzdy fılosofııalyq máseleler týraly oılandyrady jáne alańdatady. Sahnalandyrylǵan oqıǵa kez-kelgen ulttyń kórermeni úshin túsinikti boldy, bul onyń jalpyǵa arnalǵan kórkemdik týyndy ekeniniń kýási.
Aıta keteıik, Abaı oblysynyń teatrlary eki birdeı halyqaralyq baıqaýda top jardy.