Máskeý, Mınsk, Baký: Taldyqorǵan dárigerleri onlaın translıatsııa arqyly ota jasady
Kópsalaly aýrýhanada medıtsına ǵylymdarynyń kandıdaty Danııar Jaqypovtyń qatysýymen laparoskopııalyq gısterektomııa, promontofıksatsııa, konservatıvti mıomektomııa operatsııasy jasaldy. Operatsııa jasaý sáti biriktirilgen operatsııalyq bólmede Máskeý, Mınsk, Baký qalalaryndaǵy dárigerlerdiń onlaın qatysýymen ótti.
Sonymen qatar «OR1 FEST» endohırýrgııalyq onlaın jáne oflaın kongresi aıasynda uıymdastyrylǵan halyqaralyq master-klass Aqtaý, Nur-Sultan, Almaty, Taldyqorǵan, Máskeý, Mınsk, Baký qalalarynda ótti. Operatsııa OR1 biriktirilgen operatsııalyq bólmede tikeleı efırde translıatsııalandy.
«Operatsııa kezinde hırýrgtar, gınekologtar óz tájirıbelerimen bólisip, biriktirilgen operatsııalyq bólmelerde jumys isteýdiń múmkindikteri men artyqshylyqtary týraly aıtty. Bundaı tájirıbe dárigerlerdiń biliktiligin arttyryp, hırýrgtar men gınekologtardyń jańa deńgeıde ota jasaýyna múmkindik beredi. Bul aýrýhananyń operatsııa bólmeleri barlyq qajetti jabdyqtarmen jabdyqtalǵan», - dedi Taldyqorǵan qalalyq kópsalaly aýrýhananyń dırektory Jumahan Moldakýlov.
Esterińizge sala ketsek, «OR1 FEST» endohırýrgııalyq onlaın jáne oflaın kongresi Aqtaý qalasyndaǵy oblystyq perınataldyq ortalyǵynda OR1 biriktirilgen operatsııalyq júıesiniń ashylǵanyna 10 jyl tolýyna oraı uıymdastyrylǵan bolatyn.
