Máskeý metrosynda qaza tapqandardy jerleý rásimderi juma kúni bastalady
ASTANA. QazAqparat - Máskeý metrosyndaǵy Arbat-Pokrovskıı jelisinde bolǵan apattan qaza tapqandardy jerleý 18 shildede bastalady, dep habarlady ITAR-TASS.
Qaza tapqandardyń biri 28 jastaǵy Tatıana Shamsheeva týǵan jeri Lıpetsk oblysynda jerlenedi. Qalǵan marqumdardy jerleý oryndary áli anyqtalmaǵan.
Qala basshylyǵynan habarlanǵandaı, jerleý rásimi men múrdelerdi ózge qalalarǵa tasymaldaý shyǵynyn Máskeý merııasy óteıdi. Sońǵy derekter boıynsha, apattan 23 adam qaza tapty. Japa shekkenderdiń sany 150-den asty. Zardap shekkenderdiń otbasylaryna tólemder tóleý áli bastalǵan joq. Habarlamadaǵy derekter boıynsha, Máskeý úkimeti ár qaza tapqannyń týysyna 1 mln. rýbl, aýyr jaraqat alǵandarǵa 500 myń rýbl, ortasha deńgeıde zardap shekkenderge 250 myń rýbl, jeńil jaralanǵandarǵa 50 myń rýbl tóleıdi.
