«Máskeý metrosynda «Almaty» ataýyna oryn joq pa?» - respýblıkalyq basylymdarǵa sholý
***
QR Prezıdenti N.Á.Nazarbaev «Áleýmettik-ekonomıkalyq jańǵyrtý - Qazaqstan damýynyń basty baǵyty» atty bıylǵy Joldaýynda da bilim, ǵylym salasyna erekshe mán berdi. Elbasymyz osy salaǵa aıryqsha kóńil bólý sebebi nede, elimiz úshin mańyzdy sala aldynda sheshýin kútken qandaı kúrdeli tapsyrmalar bar? Bul jáne basqa suraqtar tóńireginde «Egemen Qazaqstan» gazetine bergen suhbatynda QR Bilim jáne ǵylym mınıstri Baqytjan Jumaǵulov keńinen áńgimeleıdi. Basylym tilshisiniń barlyq saýaldaryna tuşymdy jaýap bergen ol: «Elbasymyzdyń erekshe nazar aýdarǵanyn eskere otyryp, Nazarbaev Ýnıversıteti men Nazarbaev Zııatkerlik mektepteri tájirıbesin búkil Qazaqstannyń bilim berý júıesine taratý úshin olardyń jetistikterin jalpyǵa bilim berý úderisine engizýdemiz. Bul oraıda barlyq bilim berý standarttary, barlyq deńgeıdegi, ıaǵnı orta, tehnıkalyq, kásiptik, joǵary bilim, jańa formatsııadaǵy, ǵylymı kadrlardy daıyndaýdaǵy bilim berý mazmuny men ádistemesi qaıta qaralady», - deıdi. Suhbat «Erkin eldiń erteńi - kemel bilim men ǵylymda» degen taqyryppen berilgen.
Keshe Májilis Tóraǵasy Nurlan Nyǵmatýlınniń jetekshiligimen ótken palatanyń kezekti plenarlyq otyrysynyń kún tártibinde 2012-2014 jyldarǵa arnalǵan bıýdjet pen osy ýaqyt aralyǵynda Ulttyq qordan bólinetin kepildendirilgen transfert máseleleri talqyǵa tústi. Osyǵan oraı «Egemen Qazaqstan» gazetinde «Bıýdjet búıiri tolyǵyp, Senatqa jol tartty» degen taqyryppen maqala jarııalandy. basylymnyń atap ótýinshe, barlyq ózgerister Memleket basshysynyń Qazaqstan halqyna Joldaýynda bergen tapsyrmalaryn iske asyrýǵa baǵyttalǵan. Belgili bolǵany - respýblıkalyq bıýdjettiń kirisi 2012 jylǵa bekitilgen josparǵa qaraǵanda 306,1 mlrd. teńgege ulǵaıyp, 3 615,8 mlrd. teńge somasynda aıqyndalyp otyr.
***
«Alash aınasy» gazetiniń turaqty «Dat!» aıdarynda Makroekonomıkalyq zertteý ortalyǵynyń dırektory Oljas Qudaıbergenovpen aradaǵy suhbat «Shıkizattyń emes sektordyń barlyǵynan qosymsha qun salyǵyn alyp, onyń ornyna satylym salyǵyn engizý qajet» degen taqyryppen berilgen. Basylym tilshisiniń barlyq saýalyna egjeı-tegjeıli jaýap bergen ol: «Bıylǵy jyldyń sońyna deıin devalvatsııanyń qaıtalanýy ekitalaı. Al ol kelesi jyly oryn alýy yqtımal bolsa, onyń jyldyń sońynda bajaılaýǵa bolady. Qalaı degenmen de devalvatsııa máselesi taǵy da kóteriledi dep senemin. Ásirese kórshi elder óz valıýtasyna devalvatsııa jasap jatsa», - deıdi.
Bizdiń qaýym soltústikte jatqan kórshimizdi strategııalyq áriptes dep esepteıdi. Saıası, ekonomıkalyq, mádenı jáne rýhanı saladaǵy tyǵyz qarym-qatynasty qamtamasyz etetin áriptestiktiń mánin túsinetinder de, túsinbeıtinder de osy sózdi jıi qoldanady. Áıteýir, búıregi buratyn bir el bolsa, ol Reseı dep esepteıtinder az emes. Qudaıdaı syılaıtyn kórshimiz, shyn mánisinde, bizge qalaı qaraıdy, qalaı qabyldaıdy? Bizdi áriptes el retinde qujat júzinde kórsetkenimen, is júzinde moıyndaı ma? Bul jaıynda tereńirek bilgińiz kelse, «Alash aınasy» gazetindegi «Máskeý metrosynda «Almaty» ataýyna oryn joq pa?» degen taqyryptaǵy maqalaǵa kóz salyńyz.
***
«Keshe Aqordada Memleket basshysy Nursultan Nazarbaevtyń tóraǵalyǵymen Qazaqstan Respýblıkasy Ulttyq qoryn basqarý jónindegi keńestiń otyrysy bolyp ótti», - dep jazady «Kazahstanskaıa pravda» gazeti búgingi nómirindegi «Rabotat na razvıtıe strany» degen taqyryptaǵy maqalasynda. Basylymnyń atap ótýinshe, otyrys barysynda Ulttyq qordy odan ári damytýdyń jáne basqarý tıimdiligin arttyrýdyń ózekti máseleleri talqylandy. Sondaı-aq jıyn barysynda daǵdarysqa qarsy baǵdarlamalardy iske asyrý úshin bólingen qarjyny qaıta paıdalaný jáne Ulttyq qordan «QazMunaıGaz» UK» AQ úshin oblıgatsııalyq zaım berý máselesi zerdelendi. Ulttyq qordan «QazMunaıGaz» UK» AQ úshin jalpy somasy 4 mlrd. AQSh dollary kóleminde oblıgatsııalyq zaım berý týraly sheshim Qashaǵan jobasyn qoldaý aıasynda qabyldandy. «QazMunaıGaz» AQ qarjylandyrýdy eki transh boıynsha 2013 jáne 2015 jyldary júzege asyrý josparlanýda.
