Máskeý merııasy sheneýnikter sanyn qysqartpaq

MÁSKEÝ. KAZINFORM — Máskeý qalasy ákimshiliginiń basshysy Sergeı Sobıanın bıylǵy jyldyń jazy bastalǵanǵa deıin elordada qalalyq basqarýshy-sheneýnikterdiń shtat sany qysqartylatynyn málimdedi. Bul týraly Kazinform agenttiginiń Máskeýdegi tilshisi merııanyń baspasóz qyzmetine silteme jasap habarlady.

Málimetke sáıkes, aǵymdaǵy jyldyń qańtar–aqpan aılarynyń qorytyndysy boıynsha bıýdjet kiristeri 2%-ǵa artqan. Bul kórsetkish jyldyq bıýdjetti qalyptastyrý kezinde josparlanǵan 6,5%-dyq ósimnen tómen.

Bıýdjetti teńgerimdeý maqsatynda qala bıligi 2026 jyldyń 1 maýsymyna deıin Máskeý atqarýshy bılik organdaryndaǵy azamattyq memlekettik qyzmetshiler sanyn 15%-ǵa qysqartý týraly sheshim qabyldady. Sonymen qatar basqarýshylyq fýnktsııalary bar keıbir vedomstvolyq mekemelerdiń qyzmetkerleri de qysqartýǵa iligedi.

Alaıda turǵyndarǵa áleýmettik qyzmet kórsetetin mekemeler qyzmetkerleriniń sany qysqartylmaıdy.

Sondaı-aq 2026 jylǵa josparlanǵan ınvestıtsııalyq baǵdarlamany qarjylandyrý shyǵyndaryn 10%-ǵa ońtaılandyrý kózdelip otyr. Atap aıtqanda, qalalyq ortany abattandyrý jáne mádenı-buqaralyq is-sharalardy ótkizýge qatysty keıbir jobalar qysqartylyp nemese keıingi merzimge shegeriledi.

Sonymen birge renovatsııa baǵdarlamasy, metro qurylysy jáne basqa da negizgi jobalar josparlanǵan merzimde júzege asyrylady.

Eske sala keteıik, BAÁ-den shamamen 7 myń reseılik týrıst elge qaıtaryldy.