Máskeý meri saılaýynda Sergeı Sobıanın jeńiske jetti
MÁSKEÝ. 9 qyrkúıek. QazAqparat - Máskeý qalasynyń meri laýazymyna saılaýda Reseı astanasy meriniń ýaqytsha mindetin atqarýshy, ózin-ózi usynǵan kandıdat Sergeı Sobıanın alǵashqy týrdyń ózinde senimdi jeńiske jetti. Máskeý turǵyndary sońǵy 10 jylda tuńǵysh ret merdi saılaý múmkindigine ıe bolǵan edi.
Máskeýlik saılaý komıssııasynyń málimetteri boıynsha jergilikti ýaqytpen saǵat 2-de 77,5% hattama óńdelip bolǵan, Sobıanınge saılaýshylardyń 51,45%-y daýys bergen. Ekinshi orynda oppozıtsıoner, bloger Alekseı Navalnyı («PARNAS» partııasynan) - 27,13%.
Basqa úmitkerler edáýir artta qalyp otyr: Ivan Melnıkov (RFKP) - 10,68%, Sergeı Mıtrohın («ıAbloko» partııasy) - 3,5%, Mıhaıl Degtıarev (RLDP) - 2,89%, Nıkolaı Levıchev («Spravedlıvaıa Rossııa») - 2,82%. Jalpy Máskeýdegi saılaýǵa qatysý kórsetkishi - 33,23%.
RF OSK málimetteri boıynsha, Máskeý oblysynda da gýbernatordyń ýaqytsha mindetin atqarýshy, «Edınaıa Rossııa» atynan saılaýǵa túsken kandıdat Andreı Vorobev alda keledi. 12,73% bıýlletenderdi óńdegennen keıin Vorobevke 78,11% daýys berilgen. Oblystaǵy saılaýshylardyń belsendiligi 36% qurady.
Esterińizge sala keteıik, 8 qyrkúıek kúni Reseı Federatsııasynyń 80 sýbektisinde Biryńǵaı saılaý kúni ótkizildi. Onyń barysynda 7 myńǵa jýyq saılaý men jergilikti referendýmdar ótti.
