Máskeý men Frantsııada bedeýlikti emdeý boıynsha jasalǵan operatsııalar on-laın rejiminde Astanada kórsetildi

Telemedıtsınanyń jetistikteri búgin Astanada «Bedeýlikti emdeýdiń qazirgi sheshimderi. Qosalqy reprodýktıvti tehnologııalardyń problemalary» taqyrybynda bastalǵan ІІІ Halyqaralyq ǵylymı-tájirıbelik konferentsııa barysynda taǵy bir pash etildi.

Otalardyń tikeleı kórsetilimin konferentsııaǵa qatysqan Qazaqstan, Reseı, Ýkraına, Qyrǵyzstan, Frantsııa, Belgııa, Grekııa, Izraıl memleketterinen reprodýktıvti tehnologııa salasyndaǵy jetekshi mamandar, bedeýlik máselesimen aınalysatyn akýsher-gınekologtar, andrologtar, genetıkter, jatyrdan tys uryqtandyrý ortalyqtarynyń ókilderi, barlyǵy 300-ge jýyq adam kórdi.

Astana ýaqytymen saǵat 14.15-te bastalyp, 15.30-da aıaqtalǵan operatsııany Máskeý oblystyq akýsherlik jáne gınekologııalyq ǵylymı zertteý ınstıtýtynan professor Aleksandr Popov ótkizdi. Reseılik ǵalym bedeýlik kezindegi endovıdeohırýgııanyń múmkindikterin kórsetti.

Popovtyń sheberlik-sabaǵynan keıin, ile-shala Frantsııanyń Klermon-Feran emhanasynan tikeleı efır qosyldy. Professor Revaz Bocharoshvılı konferentsııa qatysýshylaryna endometrıoz kezindegi endovıdeohırýrgııanyń múmkindikterin kórsetýge tyrysty.

Aıta keteıik, Qazaqstanda jatyrdan tys uryqtandyrý (EKO) problemasy alǵash ret 1995 jyly Almaty qalasyndaǵy reprodýktıvti ortalyqta qolǵa alyndy. Qazaqstandyq dárigerler eńbekteriniń alǵashqy jemisin kelesi jyly-aq kórdi. «Probırkadan» shyqqan birinshi qazaqstandyq bala bıyl 15 jasta.

Osy jyldar ishinde elde áıelder men erler bedeýligin emdeýdiń eń ozyq reprodýktıvti emdeý tehnologııalary ıgerildi. Búginde jumys istep turǵan 10 EKO ortalyǵynda 20 myńǵa jýyq jup emdelip, kópten kútken 6 myńǵa jýyq sábı dúnıege keldi. Baǵdarlamanyń tıimdiligi Eýropanyń jetekshi ortalyqtaryna saı jáne onyń tıimdilik deńgeıi 40 paıyzdan asady. Qazaqstandyq derekter 2008 jyly eýropalyq Qosalqy reprodýktıvti tehnologııalar tizimine endi.