Máskeý men Baıqońyr arasyndaǵy tikeleı áýe reısi toqtady
«Sońǵy reıs 2018 jyldyń 7 jeltoqsanynda ushty», - dep habarlandy Baıqońyr qalasynyń áýe kassasynan.
Al QR IIDM Azamattyq avıatsııa komıtetiniń habarlamasyna súıensek, sońǵy jyldary reseılik áýe kompanııalary Máskeý - Baıqońyr - Máskeý baǵytyndaǵy reısterdi turaqsyz sıpatta oryndap keledi. Negizinen ushaqtar Baıqońyrǵa Máskeýden ǵaryshkerler men olardyń otbasyn jetkizý maqsatynda ushýda. ıAǵnı, Máskeý men Baıqońyr arasynda turaqty reıs joq.
«Turaqsyz reısterdi reseılik áýe kompanııalary oryndaıdy. Jýyq arada eki qala arasynda taǵy da reıster oryndalady. Naqtyraq aıtqanda, osy jyldyń aqpan jáne naýryz aılarynda «ALROSA» áýe kompanııasy «Roskosmos» qyzmetkerleri men olardyń otbasyn tasymaldaý maqsatynda Máskeý (Domodedovo áýejaıy) - Baıqońyr (Kraınıı áýejaıy) - Máskeý (Domodedovo áýejaıy) baǵdary boıynsha birneshe turaqty emes reıster oryndaıdy. Sonymen qatar, osy jyldyń aqpan aıynda reseılik taǵy bir «Nord Star Airlines» áýe kompanııasy da S.P. Korolev atyndaǵy «Energııa» zymyrandy-ǵarysh korporatsııasynyń qyzmetkerlerin tasymaldaý úshin Máskeý (Domodedovo áýejaıy) - Baıqońyr (Kraınıı áýejaıy) - Máskeý (Domodedovo áýejaıy) baǵdary boıynsha ushaq ushyrmaq», - delingen Azamattyq avıatsııa komıtetiniń habarlamasynda.
Osylaısha, Máskeý men Baıqońyr arasyndaǵy turaqty emes áýe reısterin «Baıqońyr» ǵarysh aılaǵy kompanııasynyń tapsyrysymen reseılik áýe kompanııalary júrgizedi. Áýe kompanııalarynda atalǵan baǵyt boıynsha ushýǵa barlyq quqyq bar.