Máskeý men Baký arasynda krýızdik laıner qatynaıdy
ASTANA. KAZINFORM — Máskeý men Baký arasynda krýızdik qatynas jaqyn arada iske qosylýy múmkin. Lıýks sanatyndaǵy laınermen eki baǵyttaǵy sapar shamamen 14 kúnge sozylady, dep habarlaıdy Kazinform agenttigi AZERTADJ-ǵa silteme jasap.
Bul týraly Reseıdiń Ázerbaıjandaǵy saýda ókili Adam Hakımov «Zvezda» telearnasynyń efırinde málimdedi.
Onyń aıtýynsha, lıýks sanatyndaǵy krýızdik laınermen sapar eki baǵytta shamamen 14 kúnge sozylady. Onyń jeti kúni Máskeýden Bakýge, qalǵan jeti kúni keri baǵytqa josparlanǵan.
— Jaqyn arada Máskeý — Baký baǵyty boıynsha krýızdik laınerdi iske qosýdy josparlap otyrmyz. Qazir bir keme tolyq daıyn, taǵy eki keme jolǵa shyǵýǵa ázirlenip jatyr. Joba sátti júzege assa, qalǵan eki kemeniń de Bakýge qatynaýyna úmit artamyz, — dedi ol.
Saýda ókiliniń aıtýynsha, joba memleket qoldaýymen júzege asyrylyp jatyr. Atap aıtqanda, krýızdik kemelerdiń qurylysyna Reseıdiń Ónerkásip jáne saýda mınıstrligi de sýbsıdııa bóledi.
Eske salaıyq, buǵan deıin ekonomıkalyq turaqsyzdyqqa, energııa tasymaldaýshylar baǵasynyń joǵary bolýyna jáne halyqaralyq qaqtyǵystarǵa qaramastan, teńiz krýızderi naryǵy turaqty ósip kele jatqanyn jazǵanbyz.
2025 jyly krýızdik saıahattarǵa shyqqan jolaýshylar sany 37 mıllıonnan asyp, tarıhı rekord ornatty.
Halyqaralyq krýızdik kompanııalar qaýymdastyǵy suranys aldaǵy ýaqytta da arta túsedi dep boljap otyr. Uıymnyń baǵalaýynsha, 2026 jyly jolaýshylar sany 38 mıllıonnan asyp, 2029 jylǵa qaraı 42 mıllıonǵa jetedi.
