Máskeý memlekettik ýnıversıteti stýdentteri Qazaqstan tarıhyn mindetti túrde oqıdy
NUR-SULTAN. QazAqparat -Senatta «QR Úkimeti men RF Úkimeti arasyndaǵy M.V. Lomonosov atyndaǵy Máskeý memlekettik ýnıversıtetiniń Qazaqstandyq fılıalynyń jumys isteýi týraly kelisimdi ratıfıkatsııalaý týraly» zań jobasy qaraldy, dep habarlaıdy QazAqparat tilshisi.
Aıta keteıik, Qazaqstandyq fılaldyń qyzmetin odan ary zańnamalyq turǵyda bekitý maqsatynda 2017 jylǵy 9 qarashada Chelıabınsk qalasynda QR Úkimet men RF Úkimeti arasynda M.V. Lomonosov atyndaǵy Máskeý memlekettik ýnıversıtetiniń qazaqstandyq fılıalynyń jumys isteýi týraly kelisimge qol qoıyldy. Osy kelisim fılıaldyń jumys isteýin retteıdi. Onda oqytý Máskeý memlekettik ýnıversıtetiniń oqý baǵdarlamalary negizinde júzege asyrylady.
«Sonymen birge, kelisimde Qazaqstannyń joǵary oqý oryndarynda kózdelgen kólemde Qazaqstan tarıhy men qazaq tilin mindetti túrde oqytý qarastyrylǵan. Budan basqa, oqý josparlarynda Qazaqstan ekonomıkasynyń erekshelikteri eskerilgen. Birinshi jáne ekinshi kýrstarda Qazaqstandy jańǵyrtýdyń ózekti máseleleri týraly áleýmettik-gýmanıtarlyq pánder oqytylady. Qazaqstan fılıalynyń qyzmetine múlikti óteýsiz berý jáne bilim granttaryn bólý arqyly qatysady. Fılıal múlikti eshkimge bere almaıdy, onyń qyzmeti aıaqtalǵan jaǵdaıda, múlik Qazaqstanǵa qaıtarylady» - dedi QR Bilim jáne ǵylym vıtse-mınıstri Rústem Bıǵarı Parlament Senaty Áleýmettik-mádenı damý jáne ǵylym komıtetiniń keńeıtilgen otyrysynda.
Onyń sózine qaraǵanda, jyl saıynǵy qabyldaý jospary 125 stýdent pen 40 magıstrantty quraıdy. Búginde fılıalda 605 stýdent bilim alady. Fılıal jeke zańdy tulǵa bolyp eseptelmeıdi, sondyqtan Máskeý ýnversıtetiniń lıtsenzııalary men akkredıtatsııasy negizinde jumys isteıdi. Osyǵan baılanysty kelisimde fılıaldyń bilim berý jáne qarjy-sharýashylyq qyzmetin baqylaý úshin vedomstvolyq komıssııasy kózdelgen. Fılıal qyzmeti 3 jylda bir ret tekseriledi, sondaı-aq Qazaqstan zańnamasynda belgilengen ózge de tekserýler ótkizýge bolady.
Oqýdy sátti aıaqtaǵan stýdentterge Máskeý memlekettik ýnıversıtetiniń dıplomy beriledi. 390 professor men oqytýshynyń 130-y bas ýnıversıtetten tartylady. 14 jyl ishinde 1 725 maman daıarlanyp shyqty. Monıtorıng nátıjelerine qaraǵanda, sońǵy 5 jylda túlekterdiń 93 paıyzy Qazaqstanda jumysqa ornalasty. Qazaqstan zańnamasyna sáıkes, fılıal túlekteriniń mindetti túrde jumys óteý qajettigi kelisimde bekitilgen.
Talqylaý barysynda komıtet músheleri atalǵan zań jobasyn Senattyń jalpy otyrysyna shyǵarý týraly sheshimdi qabyldady.
Eske salsaq, 2000 jyly QR Tuńǵysh Prezıdenti Nursultan Nazarbaev M.V. Lomonosov atyndaǵy Máskeý memlekettik ýnıversıtetiniń Qazaqstandaǵy fılıalyn ashý jóninde bastama kóterdi. Sol jyly 9 qazanda RF Prezıdenti V. Pýtınniń Qazaqstanǵa sapary kezinde fılıaldyń qurylýy týraly hattamaǵa qol qoıyldy. Fılıal osy ýaqytqa deıin L.N. Gýmılev Eýrazııa ulttyq ýnıversıtetiniń bazasynda qyzmet etýde.
