Máskeý mańyndaǵy mektepte oqýshy oq atyp, jasandy jarylǵyshty iske qosqan
ASTANA. QazAqparat - Reseıdiń Máskeý oblysy Ivanteevka qalasyndaǵy №1 mektebinde 5 qyrkúıekte jasóspirim pnevmatıkalyq qarýdan ǵımarattaǵylarǵa qarsy oq atqan. Oqýshy ustaldy, bastapqy málimet boıynsha shabýyldan tórt adam zardap shekken. Biri muǵalim, qalǵany oqýshylar, dep habarlaıdy QazAqparat reseılik BAQ-qa silteme jasaı otyryp .
Shabýyl jasaǵan kúdiktiniń aty Mıhaıl, onyń jasy 15-te.
Aty-jónin aıtýdan bas tartqan oqýshy qyzdyń biri RT telearnasyna, kúdiktiniń tuıyq adam ekendigin málim etken. Onyń aıtýynsha, «jasóspirimmen aralasqan qurbylary oqýshy shabýyl jasaýdy kózdep júrgenin aıtqanymen oǵan eshkim senbegen».
TASS agenttiginiń derek kózine qaraǵanda, quqyq qorǵaýshy organdar toǵyzynshy synyp oqýshysy «5 qyrkúıekte shabýyl jasaýdy kópten beri josparlaǵan» dep málim etken.
Shabýyldyń qalaı bolǵany ázirge naqty belgisiz, oqys oqıǵa týraly aqparatty BAQ jergilikti ýaqytpen saǵat 11:00-de tarata bastaǵan. Ivanteevka qalasynyń basshysy Elena Kovaleva mektepte «terakt jasalmaǵandyǵyn» málim ete otyryp, oqýshy ustazymen kıkiljińge baryp, shekten shyǵyp ketkendigin habarlaǵan.
RBK agenttiginiń TJM-daǵy derekkózine sensek, keminde tórt adam zardap shekken. Matematıka jáne ınformatıka muǵalımasy Lıýbov Kalmykova (39 jas) basynan jaraqat alǵan (aýyr pyshaqpen soqqy jasalǵan), 17 jastaǵy M.Vıktorııa tobyǵyn shyǵaryp alǵan, 16 jastaǵy B.Vıacheslav - eki ıyǵyn synǵan, S.Alenanyń beli zardap shekken.
Olardyń barlyǵy aýrýhanaǵa jetkizilgen, muǵalıma jansaqtaý bóliminde jatyr.
Mektep ákimshiliginiń málimdeýinshe, ǵımarattaǵylar evakýatsııalanǵan. Mekemeden 300 adam syrtqa shyǵarylǵan.
Polıtsııa myltyq atyp, jarylǵysh zattardy jarǵan jasóspirimdi ustap, polıtsııa bólimine jetkizdi. Reseıdiń tergeý komıteti onyń ústinen buzaqylyq babynyń jarylǵysh zattar qoldanýy boıynsha qylmystyq is qozǵady, bul bapta 5-8 jyl bas bostandyǵynan aıyrý qarastyrylǵan.
Mektep jabyldy, balalar úılerine qaıtaryldy. Sabaq 6 qyrkúıekte bastalýy múmkin. Al, mektepti kúzetetin fırmamen kelisimshart buzyldy. Tergeýshiler mektepti jáne onyń basshylyǵyn tekserýge kiristi.
