Máskeý mańyndaǵy kottedj qalashyǵynda atys boldy
MÁSKEÝ. TASS - QazAqparat – Reseıdiń Federaldyq qaýipsizdik qyzmeti men Іshki ister mınıstrliginiń qyzmetkerleri 30 naýryz kúni Máskeý mańyndaǵy Veshkı aýylynda zańsyz qarý saýdalady degen kúdikpen er adamdy tutqyndamaq boldy. Kúdiktiniń úıin tekserý barysynda ol úıine jasyrynyp alyp, quqyq qorǵaý qyzmetkerlerine qarata oq atqan, dep habarlaıdy QazAqparat reseılik TASS agenttigine silteme jasap.
Quqyq qorǵaý organdaryndaǵy derekkózdiń málimetterine qaraǵanda, kúdikti 1960 jyly týǵan kóterme-bólshek saýda jáne qurylys fırmasynyń bas dırektory - Vladımır Bardanov.
Polıtsııa qyzmetkerleri kúdiktiniń áıeline turǵyn úıdi tintý jónindegi sot sheshimin kórsetip, úıdiń aýlasyna kirgen. Bardanov osy ýaqytta úıdiń terezesinen avtomattan oq atyp, granata laqtyra bastaǵan. Er adam quqyq qorǵaýshylarǵa qaraı barlyǵy 20 granata laqtyrǵan.
Ol jarylys jasap, polıtsııaǵa tegeýrindi qarsylyq kórsetken. Sonyń saldarynan úıden órt shyqqan. Arada birshama ýaqyt ótken soń taǵy da jarylys bolǵan.
Rosgvardııanyń arnaıy maqsattaǵy sarbazdary úıge shabýyldaý barysynda granata atqysh qoldanǵan.
Bardanovqa qatysty birneshe óndiris júrgizilgen. Onyń ishinde 148 mln rýbl salyq bereshegi bar.
Atys bastalǵanda úıde 1 sábı men 3 eresek adam bolǵan. Olardyń barlyǵy da Bardanovtyń týystary. Eresek adamdar men sábı úıden shyqqan, 1 adam ǵana qalǵan.
Oqıǵanyń kýágeri quqyq qorǵaýshylarǵa oq atqan adamnyń saıajaıynda jolbarys, aıý, sileýsin sııaqty jabaıy ańdar ustaıtynyn aıtqan.
TASS agenttigine suhbat bergen azamat kúdiktiniń bul úıdiń osydan 10-15 jyl buryn salǵanyn, alaıda kórshilerimen qatynaspaıtynyn aıtqan.
Tergeý komıteti Federaldy qaýipsizdik qyzmeti men Іshki ister organdaryna oq atý áreketi boıynsha qylmystyq is qozǵady. Kúdikti ómir boıyna bas bostandyǵynan aıyrylýy múmkin.
