Máskeý mańynda Qazaqstannan kelgen kólikten 3 er azamattyń máıiti tabyldy
ASTANA. QazAqparat - Máskeý oblysynyń Chehov aýdanyndaǵy aýyldardyń birinde kólikten 3 er adamnyń máıiti tabyldy, dep jazady TASS.
«Chehov aýdanynyń Novoselkı aýylynda kólikten úsh er adamnyń máıiti tabyldy. Olardyń neden ólgeni anyqtalý ústinde»,-dep habarlady shuǵyl jaǵdaı qyzmetiniń ókili.
Óz kezeginde RF ІІM Máskeý oblysy boıynsha Bas basqarmasy er adamdardyń deneleriniń tabylýy týraly faktini rastady. Osy oqıǵa boıynsha tergeý komıteti tekserý jumystaryn bastady.
Máıitter tabylǵan kólik Qazaqstannan kelgen, dep habarlady Tergeý komıtetiniń Máskeý oblysy boıynsha bas basqarmasy jetekshisiniń kómekshisi Olga Vradıı.
Ol senbi kúni Novosely aýdanynda turaqta turǵan fýrgonnan 3 azamattyń máıiti tabylǵanyn jáne olardyń denelerinen kúshtep óltirýdiń belgileri bolmaǵandyǵyn aıtty. Kóliktiń kabınasynda mert bolǵan azamattar paıdalanǵan gaz shamy tabylǵan.
Olar gazdan ýlanyp qalýy múmkin, alaıda olardyń óliminiń naqty sebebi arnaıy saraptaýlardan soń belgili bolady.
«Tekserý jumystarynyń qorytyndysy boıynsha, protsessýaldyq sheshim qabyldanady», dedi tergeý basqarmasynyń ókili.
