Máskeý koronavırýspen baılanysty shekteýlerdi kúsheıtpek
MÁSKEÝ. TASS – QazAqparat – Máskeý meri Sergeı Sobıanın koronavırýspen baılanysty jańa shekteýler engizdi.
Ol qalada vırýsty juqtyrǵandardyń sany edáýir óskenin jáne aldaǵy aptalarda jaǵdaıdyń odan ári nasharlaýy yqtımal ekenin aıtty, dep habarlaıdy QazAqparat TASS agenttigine silteme jasap.
Jańa shekteýler 13 qarashadan 15 qańtarǵa deıin, eki aı merzimge engiziledi.
Kolledjder men joǵary oqý oryndarynyń stýdentteri qashyqtyqtan oqytýǵa kóshedi. Oqýshylardyń kólik kartalary ýaqytsha buǵattalady. Oqýshylar men stýdentterge úıde bolýǵa keńes beriledi.
Meıramhana, kafe, klýbtar jáne basqa da oıyn-saýyq oryndary klıentterge 23:00-den 06:00-ge deıin qyzmet etpeıdi. Bul rette tamaqty jetkizý táýlik boıy jumys isteıdi. Teatr, kınoteatr jáne kontsert zaldaryndaǵy kórermenderdiń eń kóp sany úı-jaı syıymdylyǵynyń 25%-nan aspaýy tıis.
Kórermenderdiń qatysýymen mádenı, oıyn-saýyq, jáne basqa da osyndaı is-sharalarǵa, sonyń ishinde kórmelerge tyıym salynady. Shekteýler «atqarýshy bılik organdarynyń sheshimi boıynsha júrgiziletin resmı is-sharalarǵa» qoldanylmaıdy.
Buqaralyq sporttyq is-sharalar, eger olar qalalyq sport departamenti jáne Rospotrebnadzor basqarmasymen kelisilse, kórermenderdiń qatysýymen ótkizilýi múmkin. Qyzmeti azamattardyń tikeleı qatysýymen baılanysty uıymdarǵa QR-kodtar júıesin engizý usynylady. Ol buryn tek túngi oıyn-saýyq oryndaryna ǵana qatysty bolatyn. Balalar oıyn-saýyq ortalyqtary, meıramhanalardaǵy balalar bólmeleri jáne saýda ortalyqtary jumysyn toqtatady, biraq balalarǵa arnalǵan dalalyq oıyn-saýyq sharalaryna ruqsat etiledi.
