Máskeý dárigerleri almatylyq áriptesteriniń biliktiligin joǵary baǵalady

ALMATY. QazAqparat - Almaty ákimi Baqytjan Saǵyntaev «Almaty» arnasynda ótken tikeleı efırde máskeýlik dárigerlerdiń almatylyq áriptesteriniń jumysyn qalaı baǵalaǵanyn atap ótti, dep habarlaıdy QazAqparat tilshisi.

«Biz koronavırýspen kúres kezinde Máskeý merııasyna habarlastyq. Máskeýlik áriptesterimizdi ózara tájirıbe almasý maqsatynda shaqyrdyq. Bizdiń usynysymyz jerde qalǵan joq. 25 maman Almatyǵa kelip, 2 aptadaı jumys istedi. Olar Almatydaǵy barlyq aýrýhanada aýdıt júrgizdi. Reseıde sáýir-mamyrda ahýal qıyn bolatyn. Biz ótip jatqan qıyndyqty olar sol aılarda bastan ótkergen bolatyn», - dedi ákim.

Qala ákiminiń aıtýynsha, máskeýlik dárigerler eshelondaý tártibi týraly usynym bergen.

«Bastapqy kezde olarda da oryn jetispeýshiligi bolǵan. Olar naýqastardy qabyldaıtyn aýrýhanalardy eshelonǵa jiktep baryp protsesti turaqtandyrǵan. Máskeýlik áriptesterimiz bizdiń mamandardyń biliktiligin joǵary baǵalady. Almatylyq reanımatolog pen ınfektsıonısterdiń daıyndyǵy óte jaqsy», - dedi qala basshysy.

Baqytjan Saǵyntaev sheteldik áriptestermen baılanys odan ári jalǵasatynyn aıtty.