Máskeý bırjasyna salynǵan sanktsııa KASE-ni birge ala ketpeı me
ASTANA. KAZINFORM – Qazaqstan qor bırjasy ( KASE) AQSh qarjy mınıstrliginiń sheteldik aktıvterdi baqylaý jónindegi basqarmasy jarııalaǵan aqparatqa túsinikteme berdi.
«OFAC (Office of Foreign Assets Control, AQSh qarjy mınıstrliginiń sheteldik aktıvterdi baqylaý jónindegi basqarmasy) jarııalaǵan «Moskovskaıa bırja» jarııa aktsıonerlik qoǵamy men (ári qaraı – MOEX), Ulttyq klırıng ortalyǵyna, Ulttyq eseptik depozıtarııge engizilgen sanktsııalarǵa qatysty Qazaqstan qor bırjasy (KASE) mynany habarlaıdy.
2024 jyldyń 1 maýsymyndaǵy jaǵdaı boıynsha KASE-de ornalastyrylǵan aktsııalardyń 13,1%-y MOEX-ke tıesili.
OFAC shyǵarǵan №14024 atqarý buıryǵyna sáıkes, tulǵanyń SDN tiziminde bolýy aktsııalarynyń 50% nemese odan artyq úlesin SDN List -tegi tulǵa jeke ózi nemese ózge de sanktsııadaǵy tulǵalarmen birge tikeleı nemese janama baqylaıtyn bolsa, buǵattaý sanktsııalaryn qoldaný táýekelin týyndatady.
«KASE ondaı tulǵalardyń qataryna jatpaıdy jáne shekteýler Qazaqstan qor bırjasyna jáne KASE klırıng ortalyǵyna eshqandaı áser etpeıdi», - delingen KASE málimetinde.
Qazaqstan qor bırjasynyń Máskeý bırjasymen arasyndaǵy baılanys qaıta qaralýy múmkin.
«Osyǵan baılanysty Qazaqstan qor bırjasy men KASE Klırıng ortalyǵy shtattyq rejımdegi jumysyn jalǵastyra beredi. Saýda-sattyq, klırıng pen esep aıyrysýlar standartty reglament boıynsha júrgizile beredi. KASE sanktsııalyq shekteýlerdi eskerip, MOEX-pen iskerlik qarym-qatynasty jalǵastyrý máselesin qarastyrady», - dep jazylǵan resmı aqparda.
