Máskeý bıligi Kýdrın alańyndaǵy meıramhanada bolǵan jarylysty terakt dep baǵalady
ASTANA. KAZINFORM – Máskeýdiń ortalyǵyndaǵy Kýdrın alańynda ornalasqan meıramhanada qoldan jasalǵan jarylǵysh zattyń jarylýy saldarynan úsh adam qaza taýyp, taǵy 21 adam túrli deńgeıde jaraqat aldy. Máskeý meri Sergeı Sobıanın bul oqıǵany terrorıstik akt dep atady, dep habarlaıdy reseılik TASS.
1 tamyz kúni keshke Kýdrın alańyndaǵy meıramhanada qoldan jasalǵan jarylǵysh qurylǵy jarylǵan. Ulttyq terrorızmge qarsy komıtettiń (UTQK) aqparattyq ortalyǵynyń málimetinshe, oqıǵa saldarynan úsh adam kóz jumyp, 21 adam jaralanǵan.
Aldyn ala málimet boıynsha, jarylǵysh qurylǵyny meıramhanaǵa áıel adam alyp kirmek bolǵan. Kireberiste kúzetshi ony toqtatqan sátte jarylys bolǵan. Sonyń saldarynan álgi áıel, kúzetshi jáne meıramhanaǵa kelgen bir adam qaza tapqan.
Máskeý meri Sergeı Sobıanın qaza tapqandardyń jaqyndaryna kóńil aıtyp, bolǵan oqıǵany terrorıstik akt dep baǵalady.
– Keshe Máskeýde adam ómirin qıǵan qatygez terrorıstik akt jasaldy, – dedi ol.
Onyń aıtýynsha, zardap shekkenderdiń barlyǵy qalalyq aýrýhanalarǵa jetkizilip, qajetti medıtsınalyq kómek alyp jatyr. Sondaı-aq quqyq qorǵaý organdary oqıǵanyń barlyq mán-jaıyn anyqtap jatqanyn jáne kináliler mindetti túrde jaýapqa tartylatynyn aıtty.
«Alfa» arnaıy jasaǵynyń ardageri Sergeı Goncharov kúzetshiniń áreketi budan da kóp adamnyń ómirin saqtap qalǵanyn atap ótti.
– Tiri qalǵandar óz mindetin adal oryndap, qorapty teksergen kúzetshige qaryzdar. Ol zaldaǵy kóptegen adamnyń ómirin saqtap qaldy, – dedi Goncharov.
Sonymen qatar ol jarylǵysh zat salynǵan qorapty alyp kelgen áıel onyń ishinde ne baryn bilmeýi múmkin degen boljam aıtty. Alaıda bul nusqa ázirge resmı túrde rastalǵan joq.
«Rossııa segodnıa» medıatobynyń bas redaktory Margarıta Sımonıan qaza tapqan kúzetshiniń otbasyna 1 mıllıon rýbl kóleminde syıaqy beriletinin málimdedi. Onyń aıtýynsha, kúzetshiniń batyl áreketi áldeqaıda kóp adamnyń ómirin aman alyp qalǵan.
Osyǵan deıin Reseıde terakt jasaýshylardyń 80%-y 35 jasqa deıingi jastar ekeni týraly jazdyq.
