Máskeý: Aqyshev Qazaqstanda júrgizilip jatqan aqsha-nesıe saıasaty týraly aıtty

ASTANA. QazAqparat - Qazaqstan Respýblıkasynyń Ulttyq banki ınflıatsııalyq targetteý tártibinde aqsha-nesıe saıasatyn júzege asyrýdy jalǵastyra bermek. Mundaǵy sharalar arqyly 2020 jylǵa deıin ınflıatsııa boıynsha 4 paıyzdyq ortasha merzimdi maqsatqa qol jetkizý kózdelgen. Bul týraly «QazAqparat» HAA-nyń menshikti tilshisine Máskeýdegi EAEO múshe-memleketterdiń Konsýltatıvtik Keńesiniń otyrysyna kelgen QR Ulttyq bankiniń basshysy Danııar Aqyshev aıtyp berdi.

Ol óz sózinde aldaǵy 2 jylǵa ınflıatsııa boıynsha maqsatty aralyq parametrler belgilengenin atap ótti. Naqtyraq aıtqanda, ınflıatsııa boıynsha kórsetkishti 2018 jyly 5-7 paıyzǵa, 2019 jyly 4-6 paıyzǵa jetkizý kózdelgen.

«Ulttyq bank dálme-dál túsimdi qalyptastyrý men halyqtyń ınflıatsııalyq kútimin turaqtandyrý boıynsha transmıssııalyq mehanızmderdiń arnalaryn jetildirý jumysyn jalǵastyrady. Qosymsha sharalardyń qatarynda - bank sektoryn saýyqtyrý, ekonomıkany dollarsyzdandyrýǵa jigerlendirý, valıýtalyq retteý men valıýtalyq baqylaýdy ońtaılandyrý boıynsha qadamdar bar», - dedi Danııar Aqyshev.

Sonymen qatar, Ulttyq bank basshysy 2017 jyldan bastap aqsha-nesıe saıasatynyń negizgi baǵyttarynda ekonomıkany damytýdyń stsenarıılik nusqalary qarastyrylyp jatpaǵanyn atap ótti.

«Negizgi makroekonomıkalyq kórsetkishterdiń boljamdary men stsenarııleri toqsan saıyn QR UB-nyń «Inflıatsııa sholýy» basylymynda jáne bizdiń saıttaǵy «Inflıatsııanyń boljamy týraly» atty baspasóz málimdemelerinde jarııalanyp turady. Sońǵy jarııalanǵan boljamdar bazalyq stsenarııde - barreline 60 dollar dep negizdelgen», - deıdi D.Aqyshev.