Máskeý 11-sandyq nómirge kóshedi
ASTANA. 12 naýryz. QazAqparat - Máskeý qalalyq telefon stansasy 2012 jylǵy 1 shildeden bastap 4,4 mıllıon páterdi 11-sandyq nómirge kóshiredi. Bul týraly keshe «Vedomostı» gazeti habarlady.
Budan buryn stansa kez kelgen nómirdi 11-sanmen terýdi kózdeıtin júıege kóshirýdi qańtar aıyna josparlaǵan bolatyn, alaıda oǵan qajetti jabdyqtar der kezinde tolyq ázir bolmaı qaldy.
1 shildeden bastap, jeti sandy nómirdiń aldynda «8» jáne úsh sandyq «495», «498» nemese «499» nómirlerin terý qajet bolady. Buǵan deıin máskeýlikter 495 kodynyń ishindegi qońyraýlar úshin jeti nómirdi ǵana teretin.
Basqa qalalarǵa jáne elderge telefon shalýda nómir terý tártibi ózgermeıdi. Sondaı-aq shuǵyl jáne anyqtama qyzmetterin shaqyrý tásili de burynǵysha qalady.
