Maskasyz personal: Qyzmet kórsetý salasynda koronavırýs kún saıyn tirkeledi
Karantın rejımin qatań saqtaý árbir azamattyń jáne bıznes sýbektisiniń mindeti - Esmaǵambetova
«Óńirlerdegi jedel shtabtardyń janynan qurylǵan monıtorıng toptary bekitilgen rejımdi buzý faktilerin anyqtap jatyr. Máselen, Nur-Sultan qalasynda 358 nysan tekserildi. Onyń ishinde 85 paıyzy bekitilgen talaptardy saqtamaıdy. Atap aıtqanda, 116 azyq-túlik jáne 94 azyq-túlik emes taýarlary dúkeniniń satýshylary maskasyz, qolǵapsyz, arnaıy kıimsiz jumys istegen. Qoǵamdyq tamaqtaný oryndary, tis emhanasy, shashtarazdar men sulýlyq salondary da qaýipsizdik sharalaryn saqtamaǵan. Buǵan qosa, Nur-Sultan qalasynda qyzmet kórsetý salasy personaldary arasynda koronavırýs jaǵdaılary kún saıyn tirkeletindigin atap ótkim keledi», - dedi búgin elimizdiń bas sanıtarlyq dárigeri Ortalyq kommýnıkatsııalar qyzmetindegi brıfıngte.
Onyń dereginshe, Almaty qalasynda «Salavat stroı» JShS-niń qurylys alańyn tekserý barysynda bekitilgen talaptyń jartysynan kóbiniń saqtalmaıtyny anyqtalǵan. Azyq-túlik dúkenderi nan jáne nan ónimderin saqtaý erejesin buzǵan. Sulýlyq salondary men qoǵamdyq tamaqtaný oryndarynda adamdardyń kútý alańynda shoǵyrlanýy tirkelgen.
«Karantın rejımin qatań saqtaý árbir azamattyń jáne bıznes sýbektisiniń mindeti. Kásipkerlik sýbektileri talaptardy buzǵany úshin ákimshilik jaýapkershilikke tartylyp, nysan jumysy toqtatylýy da múmkin. Aıyppul kólemi 5-ten 500 AEK-ke deıingi somany quraıdy», - dedi Aıjan Esmaǵambetova.