Masqara jaǵdaı, sabotaj deýge bolady: Prezıdent joldardyń sapasyna shúılikti
ASTANA. KAZINFORM – Memleket basshysy Qasym-Jomart Toqaev qala kóshelerimen qatar, eldi mekenderden tys joldardyń sapasyna da kóńil bólýdi tapsyrdy. Prezıdent bul máseleni Qazaqstannyń «eń osal tustarynyń biri» dep atady.
Prezıdent saıabaǵynda ótken ekologııalyq aktsııada Memleket basshysy Úkimet pen ákimder qala jáne el ishindegi, ıaǵnı iri nemese shaǵyn qalalardan tysqary joldardyń sapasyna basa nazar aýdarýy kerektigin eskertti.
– Bul – bizdiń eń osal tusymyz, ony moıyndaǵan jón. Muny eshkim sheshe almady nemese sheshýge qulyq tanytpady. Masqara jaǵdaı. Ony sabotaj deýge bolady. Zań aıasynda qatań sharalar qoldanamyz, – dedi Qasym-Jomart Toqaev.
Onyń aıtýynsha, elimiz tsıfrlandyrý men jasandy ıntellektini damytý jolynda nyq qadam basty. Tabystary kózge kórinip tur, ony turǵyndar kúndelikti ómirde paıdalanyp ta júr.
– Buǵan deıin atap ótkenimdeı, elordadaǵy Ýrbanıstıka ortalyǵynyń tájirıbesin taratýdyń mańyzy zor. Olar qala keńistigin damytýda zamanaýı tásilderdi sátti qoldanyp keledi. Ortalyq elordanyń biryńǵaı sáýlet stılin aıqyndaıtyn úlgiler men dızaın-kod ázirleıdi. Munda sheteldik tájirıbe de paıdalanylady. Barlyq óńirde osy ispetti ortalyqtardyń jumysyn ýaqyt ozdyrmaı jolǵa qoıý qajet. Olar shaharlardyń birtutas ári úılesimdi kelbetin qalyptastyrýǵa tıis, – dep tapsyrma berdi Memleket basshysy.
Buǵan deıin Q. Toqaev elimizdiń árbir azamaty búgin de, erteń de «Taza Qazaqstanda» jaıly ómir súrýi kerektigin aıtqan edi.
Jyl basynan beri «Taza Qazaqstan» aktsııasyna 7 mln adam qatysyp, 130 myń gektar jer tazartylǵan.
Prezıdent «Taza Qazaqstandy» jańa deńgeıge kóterip, ulttyq tazalyq standartyn ázirleýdi usyndy.
