Maskany eń aldymen Óskemen men Semeıdegi qarttarǵa jóneltemiz - Danıal Ahmetov
SEMEI. QazAqparat – Shyǵys Qazaqstan oblysynyń ákimi Danıal Ahmetov Semeı qalasynda medıtsınalyq maska shyǵarý jumysymen tanysyp qaıtty, dep habarlaıdy QazAqparat.
Bul jaıly aımaq basshysy óziniń Facebook paraqshasynda jazdy.
«Semeıge arnaıy baryp, birneshe márte qoldanylatyn maskalardy shyǵarý jumysyn taǵy da tekserip qaıttym. Kásiporyn basshylyǵymen jáne shıkizat jetkizýshilermen birge taýar túrlerin arttyrý boıynsha birqatar usynystardy talqyladyq. Tek dáke ǵana emes, basqa da sertıfıkattalǵan materıaldardan tigýdi sheshtik. Jaqyn kúnderi Óskemen men Semeı qalalarynyń qart adamdaryna maskalardyń alǵashqy partııasyn joldaımyz. Jumys josparǵa saı júrýde. Shıkizat kózi jetkilikti», - deıdi ákim.
Danıal Ahmetov búginde Shyǵys Qazaqstanda bir de bir koronavırýs juqtyrý faktisi tirkelmegenin aıtty.
Esterińizge sala ketsek , osyǵan deıin ShQO-da kúnine 100 myń dana medıtsınalyq maska shyǵarylatyny habarlanǵan.
