Maskalardy qymbatqa satyp jatqan alypsatarlarǵa shekteý bola ma – Birtanovtyń jaýaby
«Medıtsınalyq maska boıynsha otandyq óndirýshiler táýlik boıy jumys júrgizip jatyr. Maskalar eki baǵyt boıynsha óndirilýde: birinshiden medıtsınalyq jáne sanıtarlyq, polıtsııa jáne shekaralyq qyzmetkerlerge «SK-Farmatsııa» arqyly satyp alamyz. Ekinshiden jeke dárihanalarǵa maskalar dıstrıbıýtor arqyly jetkiziledi. Sonymen qazir karantınge jatqan azamattardyń sany kóbeıgendikten, bizdiń medıtsına salasyndaǵy maskalar men basqa da qurylǵylarǵa degen qajettilik kóterilip keledi. Biz zaýyttardan maskalardy alamyz. Qalǵandary dárihanalarǵa jóneltilýde», - dedi Eljan Birtanov OKQ-da ótken baspasóz máslıhatynda.
Mınıstrdiń aıtýynsha medıtsınalyq maska boıynsha jumysty úılestiretin arnaıy shtab ta qurylǵan.
«Qaı qalada tapshylyq joǵary, sol jaqqa jiberip jatyrmyz. Qazir búkil zaýyttar táýlik boıy jumys isteýde. Tapshylyq bolsa da ol uzaqqa barmaıdy dep senemiz. Kóp jaǵdaı halyqtyń túsinigine baılanysty. Dárihanalarǵa salsaq, qazir bárin satyp alady. Odan keıin aýrýhanalarda naýqastardy qalaı emdeımiz? Medıtsınalyq qyzmetkerlerde sondaı qorǵaý quraldary bolmasa ınfektsııa tez taraıdy. Sondyqtan eń birinshiden medıtsınalyq qyzmetkerlerge, patsıentter jatqan aýrýhanalarǵa maskalar kerek», - dedi ol.
Eljan Birtanov óz sózinde ınfektsııa bolmasa maskany taǵýdyń qajeti joqtyǵyn taǵy da eske saldy.
«Olardyń da (alypsatarlardyń – avt.) máselesi belgili. Keshe de, búgin de quqyq qorǵaý organdaryna arnaıy tapsyrma berildi. Mysaly keden organdaryna da tıisti júktemeler berilip otyr. Shekara qyzmetkerleri kóp kómektesýde. Kontrabanda bolsa toqtatyp, ustap, tıisti aqparattardy bizge joldaıdy. Jalpy bizdiń negizgi maqsatymyz – eksportqa jibermeı, búkil maskany dárihanalarǵa taratý», - dedi ol.