Maska jetispeýshiligi nelikten týyndady – Almaty sanıtarlyq dárigeriniń orynbasary
ALMATY. QazAqparat - Almatyda ótken baspasóz máslıhaty barysynda qalalyq Taýarlar men qyzmetterdiń qaýipsizdigi men sapasyn qadaǵalaý departamentiniń ókilderi men Qoǵamdyq densaýlyqty saqtaý basqarmasynyń basshysy maska tapshylyǵyna qatysty pikir bildirdi, dep habarlaıdy QazAqparat tilshisi.
«Búginde maskalardyń qory shynymen az. Biraq az bolsa da bar. Kún saıyn aptekalarǵa qońyraý shalyp, maskalardyń bar-joǵyn anyqtap jatyrmyz. Tasymaldaýshylar men óndirýshilerden maǵlumat alyp turamyz. Maska tapshylyǵyn halyq ózi týdyrdy. Shyn máninde maskany aýyrǵan adam ózgelerge juqtyrmas úshin taǵýy tıis bolatyn», - dedi departament basshysynyń orynbasary Ásel Halyqova.
Onyń aıtýynsha, eki apta buryn maskanyń qunyn qadaǵalaý týraly memorandýmǵa qol qoıylǵan. Biraq kesheli beri monıtorıng jumystary toqtatyldy.
«Maskalardyń óndirisi, jetkizilýi, satylýynda jaǵdaı máz emes bolǵan soń memorandým toqtatyldy», - dedi Ásel Halyqova.
Qalalyq Qoǵamdyq densaýlyqty saqtaý basqarmasynyń basshysy Tileýhan Ábildaevtyń aıtýynsha, maskalardyń tapshylyǵyn boldyrmaý baǵytyndaǵy jumystar QR DSM tarapynan qolǵa alynyp jatyr.
«Úkimettik vedomstvoaralyq komıssııanyń deńgeıinde maska óndirýshileriniń óndirisin arttyrý úshin jumys atqarylyp jatyr. Olardyń múmkindigin keńeıtý úshin shıkizat jetkizý máselesi qolǵa alyndy. Osy sharalardyń arqasynda jekemenshik aptekalarǵa jetkiziletin maskalardyń sany artady dep oılaımyz», - dedi Ábildaev.
Munyń aldynda qalalyq Qoǵamdyq densaýlyqty saqtaý basqarmasynyń basshysy Tileýhan Ábildaev koronavırýs juqpasynyń ahýaly týraly aıtqan bolatyn.
Aıta ketý kerek , álemde koronavırýs juqtyrǵandar sany 90 myńnan asty.
Bul týraly Dúnıejúzilik densaýlyq saqtaý uıymynyń basshysy Tedros Gebrees málim etti.
Qazirgi ýaqytta álemde COVID-19 vırýsyn juqtyrǵandar sany 90 893 adam jáne odan 3110 adam qaıtys boldy.
Sońǵy 48 saǵatta Qytaıdan tysqary jerde tirkelgen 1848 naýqastyń 80%-y úsh elge tıesili: Iran, Italııa jáne Ońtústik Koreıa.
